Daini na Ja Chyum Mungga hpe hti sum ru yu ai shaloi e,  hkum katsing si ai machyi masha hpe Yesu kaw hpai sa wa ai lam na lu ga ai. Shingrai dai hkum katsing si ai wa hpe shi a lata hte ahtawk nna, tsi shmai ya na hpe myit mada nga ma ai. Raitim Madu Yesu gaw, machyi ai wa hpe nang myit hkum kaji, na a mara ni hpe raw dat kau ya sai ngu tsun dat nu ai. Hpa majaw nga yang e Madu Yesu gaw, shanhte a hkum hkrang sha n rai, myit kraw kata hta byin nga ai myit ru tsam pu garen gari nga ai lam ni hpe mung mu mada ai majaw re.

Dai masha wa gaw, hkum hkrang hkam kaja na matu tsi lajang ya ai sha n rai, mara ni hpe mung raw dat kau ya lu ai lam hpe madun dan nga ai. Anhte prat hkrun lam hta, hkum hkrang n hkam kaja ai, hpaga yunga hkrat sum ai, hpaji lam hta hkrat sum ai lam ni hpe madung da sahkut taw nga ma ai raitim, dai lam ni a shingdu maga de e, gaya gahpa hkrum ai. Bai mara raw ya na matu mung hkrit tsang ai hte dai mara ni hte n tawt lai lu ai a majaw, myit hta machyi hkrum sha nga ai mabyin ni hpe Madu Yesu gaw teng sha mu mada ya nga ai. Dai majaw anhte ni a hkum gawng hta ra rawng gawng kya ai lam ni hta sha n ga, wenyi lam yan hta ra kadawng nga ai myit a ningma ni hpe mung tsi lajang shamai ya mayu ai rai nga ai. Shingrai myit masin hkum hkrang mahkra hte shut hpyit mara ni hpe raw kau ya lu ai Madu kaw sit sa ap nawng nga ga law.