Daini na Ja Chyum Mungga hpe hti sumru yu ai shaloi e, Yesu hkrung rawt sai hpe Kasa Thoma kam sham ai lam na chye lu saga ai. Ya dai ni nawku hpung gaw Kasa Thoma a poi hpe galaw nga ga ai. Masha law law gaw shi hpe e tinang hkum nan mu yang sha kam ai wa Thoma ngu matsing ma ai. Kasa Thoma a Madu Yesu a ntsa tawng da ai n rup n tsen kam shut ai lam hpe aloi sha tsun chye ai raitim, teng sha tsun ga nga yang e, anhte gaw shi hta na pyi grau lang law law tsun jahpyak chye ga ai re. Anhte ni a prat hta hkrum ang ai mayak shoi hpa lam ni, hkrat sum mat ai lam ni hkrum katut wa ai ten , tinang a kyu hpyi lam ni n hpring zup ai ten ni hta Karai Kasang teng sha gaw nga ai kun? Nga nna ga san san chye ga ai n rai ga ni?

Kam shut ai myit ni rawng chye nga ga ai. Madu Yesu gaw Thoma a n rup n tsen kam shut ai lam hpe jeyang daw dan ai lam n nga ai. Kasa ni hte Thoma arau nga nga ai ten hta bai sa nna, “Na a yungnu hpe ladawn n htawm, n dai kaw bang yu nna, nye a lata hpe yu u; n kam hkum rai et, kam sham u, ngu wu ai. Thoma kam shut ai raitim Madu Yesu gaw shi hte bai hkrum zup ai zawn, anhte kam sham myit ningra mat ai ten ni hta Madu Yesu gaw anhte hte hkrum mayu nga ai. Dai majaw anhte a kam shut ai lam ni, ga san ni hpe shagrit shanem ai myit hte Madu kaw la sa ga. Bai n chye madat ai lam ni hpe mung san ga. Shaloi e anhte mung Thoma zawn makam masham gawng kyra kaw n na, grau hkum zup ngang kang ai kam sham madang de lu na rai nga ga ai law.