Daini na Ja Chyum Mungga hpe hti sumru yu ai shaloi e, Agyi wa a si mat sai shayi sha hte Sai htaw ai Num sha a lam hpe na lu ga ai. Dai ni na chyum mungga hta e, Madu Yesu a matsan dum lama ai lam hte kam sham myit atsam hpe madun dan ai mau hpa atsam lahkawng hpe mu lu ga ai. Shawng n nan e, myit ru yawn hkyen hkrum nga ai hpung salang wa gaw lahput hput di let, “nye shayi sha miyet sha nsa hkyet mat sai. Raitim mung nang sa nna, shi a ntsa e na a lata mara ya ai rai yang, shi hkrung lu na ra ai” ngu wu ai. Ndai salang wa a kam sham myit gaw, kasi kaba nan rai nga ai. Shi a kasha si mat sai rai tim, Madu Yesu a lata hte ahtawk ya jang bai hkrung wa na hpe teng sha kam sham ai.

Dai majaw Madu Yesu mung kalang lata hkan sa wa ai. Shaloi lam lapran e, Sai htaw ana lu ai shayi sha gaw, Madu Yesu a palawng banbyau hpe ahtawk hkra yang mai na re ai hpe kam sham ai majaw ahtawk hkra nna, n gup ga hkaw mi pi n tsun ai, shi a ana mai tsai mat lu ai. Ndai mabyin lahkawng yan gaw, anhte yawng hpe hkum zup ai myit mada lam, magrau grang ai kam sham myit hte Madu Yesu kaw sa na matu anhte yawng hpe sharin shaga nga ai. Daini na chyum mungga daw hta e, hpang jahtum na aten du hkra myit mada shara n nga ai lam hpa mung n nga ai ngu ai hpe tsun da nga ai. Madu Yesu gaw si ai ni hpe jakhrung sharawt nna, machyi makaw hkrum nga ai ni hpe mung tsi shamai ya ai. Hkrit kajawng nga ai ni hpe mung myit mada shara jaw ya ai Madu rai nga ai law.