Daini na Ja Chyum Mungga hpe hti sumru yu ai shaloi e, Nat kap ai ma- a ai wa hpe Yesu shamai ya ai hte shawa masha ni hpe Yesu matsan yu dum ai lam hpe na la lu ga ai. Daini na mungga hta Madu Yesu gaw Nat kap nna, ma a ai wa hpe tsi lajang ya ai shaloi e, ga shaga wa ai majaw, masha wunawng grai mau mat ma ai. Raitim Hparishe ni gaw, Nat ni a ningbaw wa hpe kam hpa nna, Nat tsadan hpe gawt shapraw ai ngu tsun ma ai. Madu Yesu a matsan dum ai majaw, masha n kau mi a salum chyinghka ni hpaw wa ai ten hta, n kau mi rai yang dai salum chying hka hpe la pat da ma ai.

Hpa mi rai tim, Madu Yesu gaw shi hpe jaw da ai lit magam hpe gun hpai nga ai. Shing rai Myu mare shagu de sa nna, kabu gara shiga hkaw tsun ai. Ana ahkya ni hpe tsi lajang ya ai. Masha ni hpe yu yang hkum hkrang hta tsi la ra ai sha n ga, tsawra myit hpang gara taw nga ai ni hpe mung mu mada nga ai. Shiga madat nu wa ni e, Madu Yesu gaw anhte hte grai tsan gang ai kaw nga nga ai n re. Anhte hpe shi a makau e nga shangun taw nga ai. Shingrai mani sum sai re ai myi man a shingdu e, grai puba ai hte magam galaw nga ai raitim, anhte a kraw kata hta, dinghkrai hkam sha ai lam hpe mu mada ya nna, anhte hte rau shi hkam sha ya let, shalan shabran ya ai wa rai nga ai.