Daini na Ja Chyum Mungga hpe hti sumru yu ai shaloi e, Sape shi lahkawng hpe Yesu shangun dat ai lam na lu ga ai. Sumsing lamu na mungdan gaw du magang ra ai. Madu a kabu gara shiga hpe pru sa nna, hkaw tsun dan mu. Daini na chyum mungga hta, Madu Yesu gaw kabu gara shiga hkaw tsun na matu, Kasa ni hpe lata la nna, lit magam jaw ai lam hpe na la lu ga ai. Madu Yesu gaw, Shi a sasana lit magam a matu, yu maya masha ni hpe lata la nga ai. Law malawng byin chye ai gaw, magam bungli hta grai kung kyang chye chyoi ai ni hpe sha amu hte, shara kaja kaw lata shara jaw chye ma ai.

Raitim Madu Yesu gaw, yak hkak nna, manu dan la ai sasana lit magam a matu yu maya masha hpan ni hpe sha lata jai lang nga ai re. Shing rai shi lata jai lang ai Kasa ni gaw, kang hta ai ni, Nga hkwi sha ai ni, masha ni n htang da ai ni hpe sha shaga la nna, jai lang ai hpe mu mada lu ga ai. Madu Yesu lata shaga la hkrum ai Kasa ni gaw, Madu Yesu a jinghku manang ni, bai shi a magam rum manang ni byin wa ai hpe mu lu ga ai. Bai lam mi hku nga yang, lata san da ai kasa ni hte Madu Yesu gaw ni htep ai, shim lum ai, sadi dung ai Madu Karai Kasang a jet ai jinghku kaja ni byin wa ai re. Anhte shi Madu a kashu kasha ni yawng mung Madu a jinghku kaja ni tai nga lu hkra shani shagu tinang a hkan sa ra ai tara lam ni hpe ta tut hkan sa shakut ga law.