Dai ni na aten na mungkan gaw hpa hpe n-gun jaw nga ai kun? Ndai mungkan a lai wa na arai ni hpe hpara sumla nawku ai lam hpe shabyin ya nga ai. Gumhpraw, ra marin ai myit, daru magam ahkang aya hpe nawku ai hku nna, lam amyu myu hku nna anhte hpe hkalem nga ai. Myit marin ai myit, hedonism, gumrawng gumtawng ai lam ni hpe shakawn shagrau nga ai.

Yesu a sharin achyin ai lam ni hpe hkap la, garan gachyan, sak hkrung hkawm sa na shara n nga mat sai zawn rai nga ai. Yesu a sharin achyin ai lam ni gaw anhte law malawng a myit masin hta shara n nga ai hpe mu lu ai gaw myit n pyaw hpa rai nga ai. Ndai lam hte seng nna anhte hpa galaw na kun? Anhte gaw, shingdu de sha tsap nna, anhte a shinggyim wuhpawng a akyang lailen hten za ai lam hpe atsin sha sakse hkam ai ni tai na kun?

Atsin sha n nga ga. Yesu a sharin achyin ai lam ni hpe tsawra myit hte nden marai hte garan gachyan na matu rawt nna lama ma galaw sa wa ga. Lagaw lahkam shagu hta Yesu gaw anhte hte rau rai nga ai majaw, zingri zingrat, yak hkak ai lam ni hpe n hkrit ga. Anhte gaw ndai mungkan hta hkrun lam hkawm ai ni rai nna, Shi a sumsing lamu mungdan hta nga ai anhte a tengman ai nta de sa wa ai hkrun lam hpe galoi mung dum nga ga.

Yesu a sharin achyin ai lam ni hpe kaga masha ni hpe nden marai hte tsun dan nna sumsing lamu shara hpe myit mada nga ga. Bai nna, ga hku hkaw tsun ai hta n shim lum ai rai yang, anhte a sak hkrung lam hku nna hkaw tsun na nden marai hpe tam ga. Yesu a ninghtoi hpe social media hku jai lang nna, Shi anhte hpe ap da ai makam masham hte myit mada lam hpe garan gachyan ga.

Ndai aten kadun mungkan hta anhte gaw lai wa lai sa masha ni sha re ai hpe galoi mung n malap ga. Yesu hpe sadi dung let hkan nang na matu lata la ai ni hpe teng man ai kabu gara lam, ngwi pyaw simsa lam hte hpring tsup lam ni ala nga ai sumsing lamu na anhte a htani htana nta a myit mada lam hpe anhte a myi hte mada yu nga ga.