Daini na akyu hpyi sumru yu na ga baw hpe: “Abiding in God’s Friendship, Karai Kasang a Htingbu tai wa let nga sa ga,” ngu nna la ga.

Shawng nnan, Chyum mungga hpe hkap madat la ga.

“Ngai hkang da ai hte maren nanhte hkan galaw myit yang gaw, nanhte nye a jinghku ni rai nga myit dai: mayam gaw shi a madu galaw ai amu hpe n chye wu ai majaw, ngai nanhte hpe jinghku ngu na ma de ai: kaning rai nme law, nye Wa kaw na ngai na la ai lam mahkra, ngai nanhte hpe tsun dan ma de ai.” Yawhan 15:14-15 hta mu lu ai.

Karai Kasang nang hpe shi a jinghku ngu shaga ai hpe chye ai kun? Yawhan 15:14-15 hta “Ngai hkang da ai hte maren nanhte hkan galaw myit yang gaw, nanhte nye a jinghku ni rai nga myit dai: mayam gaw shi a madu galaw nga ai hpe n chye wu ai majaw, ngai nanhte hpe jinghku ngu na made ai: kaning rai nme law, nye Wa kaw na ngai na la ai lam mahkra, ngai nanhte hpe tsun dan made ai” nga ai. Kam sham ai wa langai hku nna nang gaw hkum tsup ai, galai shai lam nnga ai tsawra myit rawng ai Karai Kasang hte jinghku hku lu la sai. Nang hte aten shama na matu sha grau ra sharawng ai na a Hpan Madu hte hku hkau lam lu la sai. Sumsing Kawa a tsawra myit hpe minit mi daram sha pi shi a tsawra myit npu hta atsim sha nga u. Karai Kasang a jinghku hku hkau lam hta anhte a matu hpa lachyum nga ai hpe chye lu na matu, dai ni Karai Kasang a yaw shada lam ni hpe Chyoi Pra ai Wenyi nang hpe hpaw shadan dan na ahkang jaw u.

Yawhan 15:13 hta “Jinghku wa a matu tinang a asak nawng kau hkra tsaw ra ai myit hta grau ai tsaw ra ai myit kadai mung n nga ai” nga nna tsun da nga ai. Yesu gaw shi a asak hpe ap nawng kau ai hku nna ndai mungkan hta chye da ai tsawra myit kaba dik htum hpe galaw lai wa sai. Bai nna, anhte hte hku hkau lam nga mayu ai majaw, shi myit ra ai hku galaw wa ai. Karai Kasang gaw yubak mara a majaw jahten kau hkrum ai hpe bai gram lajang na matu shi a Kasha langai sha hpe si shangun na madang du hkra nang hte hku hkau lam hpe ra sharawng nga ai.

Dai ni anhte yawng a matu ga san gaw: Yesu hte jinghku hku ai a asi hpe nang hkam sha nga ai kun? Karai Kasang hte matut mahkai nga ai majaw lu la ai myit dik lam hpe nang hkam la nga ai kun? Dai ni Chyoi Pra ai Wenyi a ra sharawng ai lam gaw, na a matu shi a asak hpe ap nawng kau ai, na a Hpan Madu hte grau sung ai hku hkau lam de nang hpe woi sa wa na matu rai nga ai. Dai ni shi nang kaw na hpyi shawn ai lam gaw, kaga hku hkau lam ni hta galaw ai zawn, shi hte na a hku hkau lam hta mung aten jaw na matu re. Shi hte hku hkau lam hpe aten hte n-gun atsam jaw na daram manu shadan na matu shi hpyi shawn ai. Hkungran ai lam gaw, lahkawng maga kaw na gumhpraw bang ai lam n nga yang, asi si ai (sh) pyaw hpa lam n lu la ai zawn, Karai Kasang hte hku hkau lam gaw anhte hpe jaw ya na matu yaw shada tawn da ai yawng hpe hkam la lu na matu, Karai Kasang hte hku hkau lam hta arang bang ra nga ai.

Karai Kasang hte teng man ai jinghku ngu ai gaw, shi a matsun maroi ga ni hpe hkan sa ai lam re ai hpe Yawhan 15:14 hta asan sha tsun da ai. Yesu gaw law htam ai asak hkrung lam de sa wa na lam hpe hpaw shadan dan sai. Bai nna, anhte hta Chyoi Pra ai Wenyi bungli galaw lu na matu, shi a asak hpe ap kau ai hku nna, dai lam de anhte hpe woi sa wa sai. Yesu hte jinghku hku na matu gaw, shi a tsawra myit hte jaw ya ai hkungga hpe bai htang ai hku nna, tinang a asak hpe ap kau na matu lata ai lam re. Karai Kasang hte jinghku hku hkawm sa na matu gaw gumrawng gumtawng ai hta shagrit shanem ai hpe lata la nna Yesu hta anhte a man e tawn da ai lam hpe hkan sa ai lam rai nga ai. Anhte gaw madu a masing hte myit ra ai lam hpe n chye ai mayam ni n rai sai, tengman ai lam hpe na ai, mu ai, hkam sha sai manang ni rai nga ga ai.

Dai ni na mungkan hta Karai Kasang hte jinghku hku na hpe nang lata la na kun? Na a matu shi a asak hpe ap kau ya ai Karai Kasang a myit ra ai hku hkan sa na matu nang lata la na kun? Dai ni prat hkrun lam hku nang hkawm sa na kun, shing nrai, tinang ra sharawng ai hku hkawm sa na hpe lata la na kun? Karai Kasang hte teng man ai jinghku hku hkat ai lam gaw, Yesu a asak jaw ai hkang da ai ga ni hpe hkan sa nna, shi hte na a hku hkau lam hta arang bang na aten hte shara jaw ai rai yang, dai ni nang hta hkum tsup ai hku lu la mai nga ai. Yesu hte hku hkau lam kaw hta asak hkrung ai hta grau nna myit dik lam hpe hpa mung n jaw lu na re. Shingran Laika, 3:20 hta “Yu u, ngai chyinghka akawk let tsap nga nngai, nye a nsen na nna chyinghka hpaw ya ai wa kadai rai ti mung, ngai shang nna shi hte rau sha na we ai, shi mung ngai hte rau sha na we ai” nga nna tsun da nga ai. Tsawra myit rawng ai Karai Kasang hpe dai ni na aten hta na a myit masin chyinghka hpaw nna shi hte kanawn mazum na matu aten jaw u.

Ya, asim sha nga nna sumru yu ga.

1. Karai Kasang a jinghku hku nna na a masa hpe myit sumru yu u. Karai Kasang nang hpe gara hku mu mada ai, Karai Kasang hpe nang gara hku mu mada ra ai ngu ai na a ningmu hpe Chyum Laika galai e shai shangun u.

“Ngai hkang da ai hte maren nanhte hkan galaw myit yang gaw, nanhte nye a jinghku ni rai nga myit dai: mayam gaw shi a madu galaw ai amu hpe n chye wu ai majaw, ngai nanhte hpe jinghku ngu na ma de ai: kaning rai nme law, nye Wa kaw na ngai na la ai lam mahkra, ngai nanhte hpe tsun dan ma de ai.” Yawhan 15:14-15 hta mu lu ai.

2. Tinang a prat hpe myit sumru yu ga. Karai Kasang hte na a hku hkau lam hta gara hku hkau lam ni hpe nang arang bang ai kun? Kadai hpe ahkyak dik htum tawn da ai kun? Gara lam ni hta Yesu a matsun ga ni hpe n hkan sa nga ai kun?

“Ngai hpe tsaw ra ai wa gaw, nye a ga madat mara na ra ai: nye Wa mung dai wa hpe tsaw ra na wu ai rai nna, anhte gaw dai wa hpang de sa nna, shi hte rau nga nga na ga ai.” Yawhan 14:23 hta mu lu ai.

3. Karai Kasang hta kaga hku hkau lam ni hpe manu shadan ai lam shagu hta myit malai lu u. Yesu a hkang da ai ga ni hpe n hkan sa ai lam ni hpe yin la nna Karai Kasang a mara raw dat ya ai lam hpe hkam la u. Na a hku hkau lam hpe rau jawm galaw na matu aten jaw u.

“Yu u, ngai gaw chyinghka akawk let tsap nga nngai: nye a nsen na nna chyinghka hpaw ya ai wa kadai raitimung, ngai shang nna shi hte rau sha na we ai, shi mung ngai hte rau sha na we ai.” Shingran 3:20.

Karai Kasang hte na a hku hkau lam hta arang bang na matu nhtoi gaw daini nan re nga ai, laga nhtoi hkum la nga ai u. Grau ahkyak ai zawn rai nga ai hpe nang yu lajang nga ai laman, Yesu hte hku hkau lam hpe hkum tawn da. Karai Kasang hpe tsawra ai gaw galoi mung shawng nnan galaw ra ai. Shi hte aten shama na gaw galoi mung ahkyak dik htum re. Yesu a hkang da ai ga ni hpe kaga hkang da ai lam ni hta grau manu shadan ai shi a hpang hkan ai wa tai na matu lata la u. Na a lam (sh) mungkan a lam hta, “shi” a lam hpe lata la u. Karai Kasang hte hku hkau lam a asi hpe na a npawt nhpang hte lam madun ai hku nna dai ni hkawm sa nga u. Karai Kasang a hpang myit masin mahkra hte hkan nang nna kaga masha ni hpe san seng ai hte hkum tsup hkra tsawra lu ai chyeju hpe lu la ai tsawra myit a npawt nhpang hpe nang hkam sha lu na re. Karai Kasang hte hku hkau lam hpe yawng hta grau manu shadan nna, nang nga sa sak hkrung nga u.

Shiga madat nga ai ni yawng hpe Chyoi Pra ai Wenyi, Shi a simsa ai chyeju jaw ya nna tut e bau sin nga u ga law!