July ( 26 ) ya shani ang ai San pra ai Jochim the Anna yan a poi nhtoi, chyeju madu Kanu Kawa ni hpe chyeju dum shakawn shagrau ai poi nhtoi masat hku nna asak kaba n jin n ngut sai, kanu kawa, kaji kawoi ni hte machyi makaw hkrum nga ai kanu kawa, kaji kawoi ni sa du kawan ai, n’gun jaw, kumhpaw kumhpa ni jaw ai hte akyu hpyi ya ai lam ramma ni galaw nga ma ai.
Lashio Saradaw Sasana, Kawnghka Jau Ginwang Ramma ni hku nna mung July ( 22 ) ya shani hta Kanu Kawa Poi N’htoi a matu asak kaba nna n jin n ngut sai, Kanu Kawa, Kaji Kawoi ni hte machyi makaw hkrum taw ai Kanu Kawa, Kaji Kawoi ni hpang de sa du kawan, n’gun jaw ai, kumhpaw kumhpa jaw, hkungga shagrau ai lam galaw lai wa ai, Ginwang up Wa Jau Paul Kareng La Tawng kaw nna mung ramma ni hte rau sa kawan katsan, Chyoi Pra Hkum jaw, akyu hpyi shaman ya ai lam galaw lai wa ai.
Laiza jau ginwang hpung masha ni kaw nna mung Wa Jau Micheal Lazum hte rau asak kaba sai hte machyi makaw hkrum nga ai kanu kawa, kaji kawoi ni hpe sa du kawan, akyu hpyi shaman ya ai, chyoi pra hkum hkan jaw ai hte kumhpaw kumhpa shagrau ai lam ni galaw lai wa ai.
Myitkyina St. Francis Xavier Mama tai jawng num ni kaw nna mung Aung Myin Tha kaw Mama ni yu gawn lajang da ai asak kaba sai adwi gumgai ni hpe sa du kawan akyu hpyi ai, woi ginsup ai hte kumhpaw kumhpa ni shagrau jaw ai lam galaw lai wa ai hpe chye lu ga ai.
Anhte Myamar mungdan na Kahtawlik Hpung gaw, July 26, shani hta kanu kawa shagrau poi masat hpe galaw nga ga ai. Chyoipra Maria a kanu yan kawa (San Joachim yan Anna) hpe hkungga lara shagrau shakawn ai kaw nna kasi kamang lenla nhtawm, ndai poi ninghtoi hpe galaw wa ai lam re hpe chye lu ai.
Karai Kasang a “Tara Kanu Shi” hta na Tara Lam 4 hta, “Na a prat galu u ga, nnu nwa ni hpe hkungga lara di u” nga ai tara lam hpe tatut hkan shadik shatup nga ga ai rai. Ndai gaw, kundinghku ni myit hkrum kahkyin nga na lam a ningpawt kaba rai nga ai.
Kanu kawa ni hte asak kaba sai ni a shaman hkam la ai. Shanhte a “shaman hkamhkaw ga” hkam la ga ai. Anhte a myit masin krawdung kata hta tsun dan n lu hkra kabu gara ga ai. Shaman hkam la ai hte, kanu kawa ni kaw na ‘mara raw dat ya ai’ hpe mung hpyi lajin la ga ai. Kanu Kawa masat poi hta shangai chyinghkai kanu kawa ni hte rau wenyi kanu kawa ni hpe mung shalawm let, chyeju dum hkungga shakawn shagrau ga ai.
