Yesu a hpang hkan ai ngu ai lachyum gaw hpa rai kun? Ahkaw ahkang hte arawng aya lang ai ngu ai gaw hpa lachyum kun? Tinang a shara hta mying gumhkawng na ngu ai lachyum kun? Lahta na langai mi mung teng sha n rai, hkan nang hkan sa ai wa tai na matu gaw makoi magap da ai agenda n lawm ai sha daw jau na matu jin jin rai nga ra ai. Hpang hkan ai wa tai na matu gaw tsaw ai de du wa na matu (sh) gara hku mi rai rai, ahkang aya hte masha ni ra sharawng ai hpe ra sharawng ai n re.

Zebedi a kasha ni a kanu gaw shi a kasha lahkawng hpe Yesu a mungdan hta shi a makau kaw dung shangun mayu ai. Hpa majaw ndai hku hpyi shawn ai kun? Yesu a hpang hkan ai wa a teng man ai lam hpe n chye ai majaw san ai re. Hpang hkan ai wa gaw shagrit shanem ai a kasi ningli rai ra ai hpe shi chye ai rai yang, dai tsaw dik ai shara hpe n hpyi na re.

Kasha lahkawng a kanu gaw, dai ni na aten na kanu kawa law law a hkrang bung sumla zawn rai nga ai. Shanhte a ma ni hpe masha ni a myi man hta tawn da mayu ai. Shawng kaw nga nna, masha yawng mu mada na hpe ra sharawng nga ma ai.

Dai ni na kanu kawa law law a myit masa gaw ndai zawn rai yang, shanhte a ma ni hpe hpa sharin ya nga ai kun? Shanhte a ma ni hpe shagrit shanem ai myit masa n’re ai sha gumrawng gumtawng ai myit masa nga hkra sharin ya nga ai. mying kaba ai lam hpe tam na matu sharin ya na malai, Shanhte a ma ni hpe kaja ai lam galaw na matu shadut ya ra ai.

Makam masham hta rawt jat galu kaba wa mayu ai rai yang, Yesu anhte hpe sharawt la mayu ai rai yang shagrit shanem chye na matu sharin la ra ai. Gara hku mi rai rai, kaba ai, tsaw ai hpe n ra sharawng na matu sharin la ra ai. Hpa majaw nga yang aten du jang kaba ai lam gaw Yesu zawn shagrit shanem ai ni kaw shingra tara hku nna du wa na re.