Daini na akyu hpyi sumru yu na ga baw hpe: “Abiding Fruit, Hkrung nga ai asi tai nga u ga,” ngu nna la ga.

Shawng nnan Chyum mungga hpe madat la ga,

“Nanhte ngai hpe lata la myit dai n rai, ngai nanhte hpe lata la nna, nanhte sa nna asi si nna, nanhte a asi grin nga u ga, ngai nanhte hpe san da made ai.” Yawhan 15:16 hta mu lu ai.

Htani htana hte akyu rawng ai asi si na matu nang hpe lata la nna lit shatsam da sai. Yawhan 15:16 hta “nanhte ngai hpe lata la myit dai n rai, ngai nanhte hpe lata la nna, nanhte sa wa nna asi si nna, nanhte a asi grin nga u ga, ngai nanhte hpe san da made ai” nga nna tsun da nga ai. Karai Kasang gaw anhte yawng hpe shi hta nga ai dai ra sharawng ai lam hpe shadik shatup na matu yaw shada let ahkyak ai hte grin nga lu ai akyu pru na matu ra sharawng ai myit hte hpan da ai. Shi gaw kaga masha langai ngai a matu n’re ai na a prat a matu masing langai mi nga ai. Nang chyu sha na a man e tawn da ai bungli ni hpe galaw lu nna, dai hpe n galaw shi yang, teng man ai myit dik lam hpe nang n’mu lu na re. Sumsing lamu na Kawa gaw, hpung shingkang rawng ai hte kabu gara ai lam ni hku nna shadik shatup na matu shi masing jahkrat da ai ra sharawng ai lam ni hpe nang hta bang da ya sai. Nang hpe gara yaw shada lam ni a matu hpan da ai hpe shi chye nna, Hkristu a marang e nang lu la mai ai law htam ai asak hkrung lam yawng hte nang hpe hpring tsup hkra galaw ya lu ai kaja ai magam bungli ni a sak hkrung lam de nang hpe woi sa na hpe ra sharawng nga ai.

Ehpesu 2:10 hta “Anhte gaw Karai Kasang a amu bungli rai nga ga ai rai nna, mai kaja ai magam bungli a matu, Karai Kasang gaw shawng nnan e hkyen lajang da sai” nga nna tsun da nga ai. Nang gaw kaja ai magam bungli galaw ai sak hkrung lam hpe hkan sa na matu hpan da hkrum ai wa re. Ndai aten du hkra na a prat hpe gara hku sak hkrung lai wa sai raitim, mau hpa lam ni hpe galaw lu na matu gaw atsam nrawng ai nre hpe dum u. Karai Kasang gaw mungkan masha ni hten za ai, akyu n rawng ai ngu sawn la ai hpe la nna, shi a kasha Yesu hte bung ai hku galai shai kau ya ai. Shi gaw nanhte hpe shi a sape shatai na matu yaw shada nga ai: mai kaja ai hte asi si ai magam bungli shagu a matu jin jin rai nga u. Karai Kasang nang hpe jai lang nna, shi nang a man e tawn da ai masing ni a sutgan hpe mu tam la na hpe dai ni kam sham nga u. Karai Kasang hpang hkan sa na rai yang, nang hpyi shawn lu ai (sh) myit mada lu ai hta grau kaja ai masing ni nga ai ngu ai tengman ai lam hpe ap nawng da u. Dai ni shi a man de myit mada let sa wa nna, shi nang hpe lam madun ya na lam yawng hpe hkam la na matu jin jin rai nga u. Karai Kasang anhte a matu masat da ya ai asi si ai prat hpe gara hku sak hkrung hkawm sa na hpe shi kaw na sharin la ai shaloi, shi a mungga hte shi a nga nga ai shara de myit masin mahkra hte shang wa ga.

Karai Kasang anhte a man e tawn da ai asi hpe si lu na matu shi hta nga nga ra ai. Tsabyi ru jaw ai malu masha n lawm yang, lakung lakying gaw asi n si lu ai zawn, anhte mung anhte a langai sha re ai teng man ai asak a npawt nhpang, sumsing lamu na Kawa hte n matut mahkai yang asi n si lu ai. Karai Kasang gaw shi a man e aten hte shi a mungga hta aten shama ai shaloi anhte a matu shi galaw da ai masing ni de anhte hpe woi sa wa ai. Shakawn Kungdawn 1:1-3 hta tsun da ai.

Tara n lang ai ni a hpaji daw ai hku n hkan ai wa, yubak kap ai ni a lam hta n tsap ai wa, asawng asang di ai ni a tingnyang hta n dung ai wa gaw a lu nga ai. Shi a tara hta kabu gara nga nna, Shi a tara hpe shani shana myit aru nga ai. Shi gaw hka kau makau e hkai da ai hpun hte bung nna, aten du jang asi si nna, de a lap n nyip mat ai hpun hte bung nga ai. Shi galaw ai lam shagu hta awng dang nga ai.

Karai Kasang a man hte mungga hta she anhte hpe hkrang shapraw, jasan jaseng, galai shai shangun ai. Shi hte aten shama ai hta sha anhte gaw n-gun ja wa nna asi si na matu jin jin rai wa lu ai. Hpun langai hpe asi law law si na matu, hpun hpe hkai ra ai zawn, Karai Kasang anhte a matu yaw shada tawn da ai kaja ai magam bungli ni hpe pat shingdang nga ai anhte a prat daw ni hpe gang je kau na ahkang jaw ra ai. Karai Kasang a man hta aten jaw nna, hkrang shapraw, shamai shatsai, galai shai wa ra ai.

Karai Kasang yaw shada ai asi si lu na matu, Wenyi hpe anhte hta, anhte hku nna bungli galaw shangun na matu sharin la ra ai. Karai Kasang gaw shi hte shi a mungga hte aten shama ai shaloi anhte hpe galai shai ya ai sha n-ga, anhte a n-gun atsam hte galoi mung n lu galaw ai kaja ai magam bungli ni hpe galaw lu na matu Chyoi Pra ai Wenyi hku nna anhte hpe n-gun jaw ya nga ai. Karai Kasang anhte hta bungli galaw ai hku nna sha anhte a gawng kya ai lam ni hpe n-gun atsam de galai shai ya ai majaw shada da teng sha tsawra hkat lu na re. Bai nna, Wenyi a marang e sha, myit masin ni galai shai wa nna, sumsing lamu na Kawa hpang de sit sa wa lu ai. Karai Kasang gaw masha ni a matu shi a myit masin hpe nang hpe jaw mayu ai. Shi a ahkaw ahkang hte tsun shaga lu na matu, bungli galaw lu na matu nang hpe n-gun jaw mayu ai. Shi a tengman ai lam hta lai nna, n’mai tsun dan ai bungli ni hpe nang hku nna galaw mayu ai. Karai Kasang a man e shagrit shanem na matu lata la nna, nang hta mung, nang hku nna mung shi hpe bungli galaw na ahkang jaw ai rai yang, nang hta nga ai Chyoi Pra ai Wenyi a asi nan hpe nang si hpang wa na re. Sape ni gaw shanhte hkrai sha chyeju kumhpa kaba, atsam kaba n lu ma ai. Chyoi Pra ai Wenyi a bungli galaw ai majaw sha, Hkristan makam masham gaw galu kaba wa nna, n-gun atsam kaba wa nna, mungkan hpe galai shai wa shangun ai. Nang galaw ai lam shagu hta Chyoi Pra ai Wenyi hte rau jawm galaw u. Na a prat hta shara shagu hta shi hpe shamu shamawt nna bungli galaw na ahkang jaw nna, Karai Kasang a mungdan hpe mungkan ga de woi sa wa na matu nang hpe jai lang mayu ai mau hpa lam yawng hpe hkam sha lu na matu ahkang jaw u.

Dai ni Karai Kasang a tengman ai tsabyi sun hta nga nga na matu aten jaw u. Shi a ga hpe na a myit masin hpe hpaw ya u. Bai nna, Chyoi Pra ai Wenyi gaw nang hta, nang hku nna gara hku bungli galaw mayu ai hpe sharin ya na ahkang jaw u. Karai Kasang nang a matu tawn da ai mau hpa masing ni gaw, dai ni na prat hta simsa lam, yaw shada lam, kabu gara lam ni hpe jaw ya lu u ga.

Ya, asim sha nga nna sumru yu ga,

1. Na a prat hku nna ahkyak ai hte grin nga lu ai asi si na matu Karai Kasang ra sharawng ai hpe myit sumru yu u.

“Nanhte ngai hpe lata la myit dai n rai, ngai nanhte hpe lata la nna, nanhte sa wa nna asi si nna, nanhte a asi grin nga u ga, ngai nanhte hpe san da made ai.” Yawhan 15:16 hta mu lu ai.

2. Karai Kasang a man hta aten jaw nna, kaja ai magam bungli ni a matu nang hpe bau maka, n-gun jaw na matu ahkang jaw u. Dai ni shi a mungdan a matu shadik shatup na matu, shi na a man e tawn da ai lam ni hpe tsun dan na matu shi hpe hpyi nem u. Chyoi Pra ai Wenyi hpe nang hta hte nang hku nna bungli galaw na matu hpyi nem u.

“Tara n lang ai ni a hpaji daw ai lam hta n hkan nang ai, yubak kap ai ni a lam hta n tsap ai, jahpoi asawng ai ni a tingnyang hta n dung ai wa gaw, a nga ai: shi a kabu gara ai lam gaw, Karai Kasang a tara hta rai nga ai, shi a tara hpe shani shana myit sumru nga ai, galaw yang, shi awng dang wa ai.” Nga nna  Shakawn Kungdawn 1:1-3 hta mu lu nga ai.

3. Kaja ai asi si na matu Chyoi Pra ai Wenyi woi awn ai hpe dai ni hkan sa na matu ga sadi jaw u. Karai Kasang nang hpe tsawra ai zawn kaga masha ni hpe mung tsawra na matu lata la u. Chyoi Pra ai Wenyi woi awn ai lam shagu hta shi hte myit hkrum ai sak hkrung lam hpe lata la u.

Karai Kasang anhte hpe hkye hkrang la, lawt lu shangun na sha n-ga, anhte, hkrat sum mat ai hte ra kadawn nga ai amyu hpe jai lang nna, mungkan hpe galai shai ya mayu ai daram, Karai Kasang a tsawra myit gaw kade daram kaba nga ai kun? Karai Kasang gaw shi a magam bungli hpe shadik shatup lu na matu shi a amyu masha ni hpe shi a Wenyi hte namman chya ya mayu nga ai. Sumsing lamu na Kawa hpe tsawra myit hte ap nawng kau ai Karai Kasang a kasha langai a mau hpa hte grin nga lu ai asi ni hte na a prat hpe masat da ya u ga.

Shiga madat nga ai ni yawng hpe Chyoi Pra ai Wenyi, Shi a simsa ai chyeju jaw ya nna tut e bau sin nga u ga law!