Daini na Ja Chyum Mungga hpe hti sumru yu ai shaloi e, sumsing lamu mungdan gaw, Chyinghkrang tum hte bung nga ai lam ga shadawn tsun da nga ai hpe na chye lu ga ai. Daini na Madu a kabu gara shiga hta e, Madu Yesu gaw sumsing mungdan a lam hpe e, kaji dik ga shadawn rai nga ai Chyinghkrang tum hte, matsi hpe shadawn sanglang dan nga ai. Kade mi kaji ai raitim, galu kaba ai lam ni hpe shabyin ya lu ai rai nga ai. Dai zawn sha kaba dik ai lam ni byin wa ai gaw, kaji ai lam ni kaw na sha byin pru wa lu ai re.

Bai Madu Yesu gaw, sumsing mungdan hpe e, kaji dik ai chying hkrang tum ga shadawn hte tsun shadum da nga ai. Kaji dik ai kaw na ningnan hpang wa ai a atsam ningja a lam, anhte hpe tsun shadum ya ai rai nga ai. Dai zawn sha kaji la ai n dan dawn ai anhte a ninggun shadat ai, shakut shaja ai lam ni, garum shingtau ya ai lam ni, akyu hpyi ya ai lam ni hte tsawra myit madun ya ai lam ni gaw, sumsing mungdan a matu, galu kaba wa na lam shabyin ya ai mung rai nga ai. Bai sumsing mungdan lam hpe matsi ga shadawn hte mung shingdaw da nga ai hpe mu lu ga ai. Dai zawn anhte a kaji la ai kumhpa ni gaw, kade ram mi kaji la ai rai tim, lam shagu hta galai shai kau lu ai re hpe Madu Yesu bai tsun shadum ya nga ai. Bai lam mi hku tsun ga nga yang, sumsing mungdan nga ai lam hpe shadum ya ai mung rai nga ai.