Daini na Ja Chyum Mungga hpe hti sumru yu ai shaloi e, Yesu hka nawng ntsa Hkawm ai hte Genezaret ginwang e Yesu galaw ai shamai shatsai ai amu lam ni hpe na la lu ga ai. Zaibru jang kaw e muk tawng manga hte nga lahkawng hpe law htam hkra mau hpa lamik kumla galaw ai. Dai masha hkying manga hpe mu nna, Madu Yesu gaw Kasa ni hpe shaga n htawm, simsa ai shara de pru mat wa ai. Dai zim ai shara hta shi hkrai sha akyu hpyi nga ai. Madu Yesu gaw Kawa Karai hte matut mahkai nna, wenyi ninggun atsam lu la na matu, myit katu nga lu ai.

Shingrai anhte ni a prat hta e mung, kabu gara lam lu la na mabyin ni byin pru wa ai ten ni hta, dum nta masha ni yawng jawm pawng let, Madu Karai Kasang kaw chyeju dum Missa Hkungga hpyi la ai. Ja gumhpraw alu bang ai. Matut na, akyu hpyi daw jau ai lam hpe galaw sa ai. Dai zawn re ai mai kaja ai lam arawn alai ni hpe galaw nga chye na mung dai ni na Madu a kabu gara shiga hta e, anhte hpe ja ja shadum ya nga ai. Bai lahkawng hku nna, Kasa Petru zawn mayak mang hkang, hkrit tsang hpa tsin yam ni hte hkrum katut wa ai shaloi e, Madu Yesu a lata hpe jum manat da nna, shi hte n daw n hka ai sha, hkawm sa ai rai yang, lam shagu hta tawt lai lu na teng sha re. Anhte yawng kam sham myit hte hkawm sa ga law.