Daini na Ja Chyum Mungga hpe hti sum ru yu ai shaloi e, Hparishe ni a htung tara lam na chye la lu ga ai. Hparishe ni hte chyum laika ka ai sara ni gaw, shanhte hkap la ai htung tara ni hpe madung ninggun jaw hkan sa nga ma ai. Lu sha n sha shi yang lata gashin ai gaw, hkam kaja lam a matu re ai hpe abwi bwi sha, shanhte gaw dawjau ai ladat lamang de galai wa kau shangun ai hku gram lajang la chye ma ai. Dai daw jau ai ladat htung hkring arawn alai ladat ni gaw, shinggyim masha ni hpe mara lu ai prat, gyit hkang da ai prat kaw nna, shalawt kau ya na matu sha rai nga ai.

Dai mabyin ni gaw, n gup kaw na pru wa ai gasi hte myit kraw kata na gyin shapraw ai. N kaja ai myit nyan marai ni gaw, shinggyim masha ni hpe sha hkra machyi chye ai re hpe e, Madu Yesu gaw ja ja madi madun tsun sharin shaga nga sai re. Shingrai shiga madat ni yawng hte e, San pra ai John Mary Vianney zawn, shagrit shanem ai hte, tsawra matsan dum lama ai myit hpe hkan sa shatup let, tinang a myit masin wenyi hpe san seng san pra ai hku tawn da nga sa chye nna, dai zawn re ai chyeju ni hpe lu hkra hpyi la nga ga law.

Dai ni gaw, San pra ai John Mary Vianney a poi ninghtoi shani rai nga ai. San pra ai John Mary Vianney gaw ginwang up jau ni hpe lak san yu garum ya ai wa nan rai nga ai. Dai majaw wa jau ni a matu lak san akyu hpyi ya ai shani mung rai nga ai. Nawku hpung masha ni, tinang a ginwang up wa jau ni yawng a matu, lak san akyu hpyi ya nga ga ngu n gun jaw daw lu n ngai law.