Daini na Ja Chyum Mungga hpe hti sum ru yu ai shaloi e, Hkanan num shayi sha hpe Yesu shamai ya ai lam na lu ga ai. Kanu langai mi a san seng ngang kang ai hte akyu hpyi ai (sh) tinang a kasha num sha ma a matu shagrit shanem ai hte hpyi shawn ai hkungga a lam ni rai nga ai. Ngai gaw nanhte a Karai Kasang, nanhte gaw ngai a myu masha ni rai nga ai, nga nna, Karai Kasang jaw da ai ga shaka hpe bai myit dum shangun nga ai. Chying hkai kanu langai mi a dam lada kaba la ai makam masham lam hte, tinang a kasha a ntsa e tawn da ai tsaw ra myit ni gaw,Madu Karai Kasang a myit hpe pyi lu galai shai kau ya nna, kaga lam yan ni mahkra hpe awng dang lam lu la mat nga sai re. Dai majaw, Madu Karai Kasang a daw sha poi hta e, sa shang sha lawm lu ai ahkaw ahkang hpe mung lu la sai re. Shingrai ndai mungga kaw na mabyin ni hpe madat hkam la let, Kanu langai mi a ngang kang ai makam masham gaw, kade ram sung la nga ai. Kade ram ngang grin nga ai ngu ai hpe anhte yawng mung sumru dinglik yu ra ga ai re. Dai zawn ngang kang ai kam sham myit nga hkra shakut sa ga law.