Daini na Ja Chyum Mungga hpe hti sumru yu ai shaloi e, Madu Yesu gaw akyu hpyi nga ai ten hta e, hpung shing kang hte hpring zup wa nna, shi hpraw nsam galai shai wa ai hpe chye lu ma ai. Shi akyu hpyi nga ai ten e, Kawa Karai a nsen hpe na lu ai. Anhte mung akyu hpyi nga ai shaloi e, Madu Yesu a nsen hpe madat yu ga. Akyu hpyi ai shara hta e, simsa ai, pyaw ngawn ai, kahkyin gumdin ai lam mung nga nga ai gaw teng sha nan re. Shingrai anhte dum nta shagu ni hta e mung, yawng  rau sha akyu jawm hpyi ai. Ndai lam ni rau sha jawm galaw ai rai yang, ngwi pyaw simsa ai dum nta shara byin nga na sha rai nga ai.

Anhte ni yawng jahkring hkring sha, Madu Karai Kasang hte jawm pawng nga sa nna, akyu hpyi ai a marang e, chyoipra ai wenyi Karai Kasang hpe hkam la nna, teng man jaw kaja ai myit marai ninggun atsam ni lu la na gaw teng sha rai nga ai law. Dai re ai majaw, anhte yawng hte mung, ngwi pyaw simsa ai hkristan prat hta sak hkrung nga pra sa lu hkra tut e shakut shaja nga ga law.