Daini na Ja Chyum Mungga hpe hti sumru yu ai shaloi e, Greek a myu sha ni n kau Yesu hpe mu mayu ma ai lam na chye lu ga ai. Jahtum chyalai asak hpe myit mada nna, sak hkrung nga pra sa na matu saw shaga ai chyum mungga nan rai nga ai. Wenyi lam yan hte seng ai mai kaja ai lam ni a matu a kyu hpyi na matu, tinang a ra sharawng ai lam hpe koi gam kau nna, bai hkrung rawt ai Madu Yesu hte arau hkawm sa na matu anhte yawng hpe saw shaga nga ai. Ding grin a nga nga ai prat hpe lu Madu na matu, tinang a ra sharawng ai lam hpe ningdang kau ai.

Bai madu lu tawn da ai rung rai ni a ntsa myit marin ai lam n nga ai sha, dai sutgan ni hpe yawng a akyu  matu sung lang ai majaw, tinang a wenyi lam hpe hkye la na matu lam matsun madun ya ai rai nga ai. Shing rai chyoi pra ai wenyi a asi apu ni gaw, anhte a ra sharawng ai lam hpe ninghkap kau nna, lu sha gam ai, mai kaja ai lam ni hta anhte shakut sa ai, ap nawng daw jau mayu ai ndai lam ni gaw teng sha nan byin pru wa na sha rai nga ai. Dai zawn re ai ap nawng daw jau mayu ai myit ni rawng nga yang chyu sha anhte kaw e, wenyi a apu asi ni gaw, tut e tu pru nga na sha rai nga ai law.  Dai ni gaw nawku hpung kaw nna, San pra ai Lawrence a poi ninghtoi mung rai nga ai. Lawrence mying lu da ai ni yawng hpe mung, ngwi pyaw ai poi ninghtoi shani rai u ga ngu yawng hpe shakram dat lu n ngai law.