August 9 Laban shani hta San Peter’s Square kaw Sunday Angelus akyu hpyi na matu zuphpawng nga ai shawa masha ni hpe tsun shaga ai shaloi, Wa Sarabyin Leo gaw, dai shani na Kabu Gara Shiga hpe myit sumru yu let, Yesu gaw “nbung laru kaba a lapran e, shi a sape ni hte rau, hka ntsa e hkawm sa wa ai” (cf. Mt 14:22–33) hpe tsun dan ai.
‘Hkum hkrit myit’
Sape ni hpe myit simsa shangun na matu yaw shada ai ndai mabyin gaw, shanhte hpe grau nna hkrit shangun ai. Ndai myit ru myit tsang aten hta, Hkristu gaw ndai hku tsun ai: “myit shaja da mu, ngai rai nga nngai, hkum hkrit myit!”ngu tsun ai.
“Madu gaw yawng mayawng hpe galai shai ya nga ai” nga nna Wa Sarabyin Leo sang lang dan da nga ai. “Petru gaw Shi hpang de sa na matu, hka leng ntsa kaw nna lahkam loi mi pyi hkawm lu ai, dai hpang shi hkrit kajawng mat nna, lup mat ai shaloi, Yesu shi hpe hkye la wu ai.” Dai majaw, Kabu Gara Shiga daw gaw, hkrit tsang ra ai lam n nga ai sha, Yesu kaw na anhte a myi hpe galoi mung n mai pat da ai lam hpe tsun dan nga ai.
Makam masham a atsam
Wa Sarabyin Leo, ndai mahkrum madup gaw, “sape ni a myit masin kaw nna, ‘Nang gaw Karai Kasang a Kasha teng teng rai nga ndai!’ ngu ai makam masham hpe tsun shapraw ai lam hpe shabyin ya ai” ngu tsun da ai.
Wa Sarabyin gaw ndai makam masham hpe tsun shaga ai lam hpe Mahte a Kabu Gara Shiga hta lawm ai kaga mabyin langai mi hte matut mahkai da ai, dai hta Yesu tsun ai gaw “Ngai nanhte hpe teng teng tsun made ga, nanhte kamsham ai myit rawng nna, kam shut ai lam n nga ai rai yang, […] ndai bum hpe, ‘Nammukdara de kabai bang kau u,’ ngu nna tsun lu na rai myit dai, dai gaw byin wa na ra ai” (Mt 21:21).”
Ndai lam gaw, Wa Sarabyin sumru ai hku nga yang, sape ni hka hkin gau ntsa e hkam sha lai wa sai lam hkrak sha rai nga ai: hka leng ai lapran e, Hkristu a simsa lam gaw shanhte hpang de du wa sai.
Nanhte hkum nan hpe galoi mung tau sawn ding lai ai lam hkum galaw mu
Wa Sarabyin Leo gaw dai mauhpa lam kaw na sharin la lu ai lam lahkawng hpe lu la ai: Langai, “awng dang ai lam hpe lu ai shaloi gumrawng gumtawng ai myit n rawng na matu”, lahkawng “manghkang ni hkrum katut ai shaloi karum shingtau lam n nga ai ngu hkam sha ai nsin sin ai aten ni hta pyi myit n daw ai sha, shakut shaja nga let, hpang de nrai, shawng de sit sa wa ai zawn hkam sha na matu.”rai ra ai.
“Masa lam shagu hta, Yesu gaw anhte hpe n kabai kau ai rai nna, anhte a prat a sanghpaw li hta shagrit shanem let Shi hpe hkap tau la ai rai yang, akyu hpyi ai, sakramentu ni, shi a mungga hpe madat mara ai hku nna, anhte a hkrun lam a matu simsa lam, ninghtoi the n-gun atsam ni hpe Shi hta mu lu na re” nga nna Wa Sarabyin tsun da nga ai.
Wa Sarabyin gaw shi a mungga hpe “Shi a makam masham a majaw shaman chyeju hkam la lu sai ngu nna ndau shabra hkrum ai, Karai Kasang hpe kam hpa let, dai the maren sak hkrung lu na matu, Nu Maria gaw anhte hpe karum ya u ga” ngu akyu hpyi ya let, shi a mungga hpung dim dat ai.