Daini na Ja Chyum Mungga hpe hti sum ru yu ai shaloi e, Sumsing mungdan e kaba dik ai wa hte dam mat ai Sagu a lam ni hpe na la lu ga ai. Uhpung uhpawng langai ngai mi kaw nga nga nna, masha law malaw a matu, akyu ara ni hpe daw jau ap nawng ya nga ai ningbaw ningla ni, ntsa tsang na kaba ai ni gaw, shanhte a reng power hpe n sung lang ai sha, tinang hkum hpe shagrit shanem let, kaga masha ni a shakawn shagrau ai ga si hpe myit mada ai lam hpa n nga ai. Dai zawn sha myit masin asan rai tinang galaw sa ra ai amu magam ni galaw na matu, ya daini Madu Yesu gaw, anhte yawng hpe myit jasu saw shaga nga ai.

Bai numdaw lahkawng hku nna yu yu ga. Anhte yawng hpe ma kaji ni a myit jasat jasa ni hpe madu da ra ai lam hpe mung tsun shadum ya sai. Hpa majaw nga yang ma kaji ni gaw myit masin grai hpraw tsawm san seng ai rai nga ai. Shanhte ma ni gaw, kabu pyaw chye ai, mara raw ya chye ai, manang ni hpe matai htang pawt sindawng galu ai lam n nga ai sha bai tsun shaga na jin jin sha re. Dai ma kaji ni a kasi la nna dai myit jasat ni hpe tinang bai lu hkan sa shakut let, tinang hta grau asak kaba sai, mahkrum madup nga ai ni hpe kam hpa nga sa let, Madu Karai a myit jasu ya ai nsen hpe madat nna, anhte yawng sak hkrung hkawm sa ga ngu tsun n’gun jaw dat lu ga ai.