Daini na Ja Chyum Mungga hpe hti sumru yu ai shaloi e, mara ndat ya ai mayam a lam hpe na lu ga ai. Madu Yesu gaw, mara raw ya ra ai lam hte seng nna, ga shadawn langai mi hpe tsun da nga ai. Bai masha hpe mara raw ya ra ai lam hte seng nna, masat daw dan da ai lam n nga ai. Anhte ni mara raw ya ai lang shagu hta e, anhte a myit masin hta myit ngwi sim sa ai hte myit hkam kaja myit dik myit pyaw lam ni hkam la lu nna, tinang a kraw kata hta e mung a san nga nna, myit masin hta nga pyaw ai nam chyim hkam sha lu ai rai nga ai.

Anhte a mara raw ai ten, Madu Karai mara rawt kau ya ai zawn, anhte mung, kaga masha ni hpe bai mara lu raw ya na chyeju hpe Karai Kasang kaw hpyi la ga. Dai zawn, jet ai kabu pyaw ai nam chyim hkam sha lu hkra shakut sa ga. Raitim kaga wa hpe mara n lu raw ya ai rai yang, anhte a masin salum kata hta myit ja ai, nga n pyaw ai lam hkam sha na rai ga ai. Bai grai li la ai lit magam gun hpai ai zawn, nga n pyaw dut dang nga na malai gaw, madu a hkum madu sharai sawn dinglik yu nna, lawan ai hku masha a mara hpe raw kau ya lu hkra shakut na gaw tinang nan sha re. Dai zawn mara raw kau ya lu ai chyeju hpe Karai Kasang kaw hpyi la nna, sim sa lam lu la hkra shakut sa ga law.