Daini na Ja Chyum Mungga hpe hti sumru yu ai shaloi e, hkungran num hte la hpe jahka ai lam na chye lu ga ai. Dai ni na kabu gara shiga hta e, hkungran sakramentu hkam ai ni ga sadi da ai mungga rai nga ai.Dai gawKarai Kasang matut da ai lam hpe masha gaw n jahka u ga, nga nna tsun da ai ga sadi re. Madu Karai Kasang a shawng e ga sadi hkam da sai ni marai shagu gaw, sadi dung na matu, Karai Kasang hpe sakse shaga da nna, yawng a man e ga sadi tawn da ai majaw, manu shadan ra sai. Dai ga sadi hpe prat tup hkan lang shatup na matu re hpe ga sadi hkam da ai yan dum ra ai.

Bai sumsing mungdan a matu tinang a hkum hpe ap nawng daw jau da sai ni yawng hte mung, Madu Karai a man kaw e, ga sadi tawn da ai re. Anhte gaw kaja ai mi raitm, n kaja ai mi raitim, Madu Karai gaw, tinang a ga sadi a ntsa e, tut nawng dinggrin sadi dung ai zawn, anhte ni mung kaja ai n kaja ai mabyin lam yan ni shagu hta e mung, hkap la nna sadi dung ai hte nga sa hkan shatup na matu, Madu Yesu gaw anhte hpe dai ni kalang mi bai tsun shadum ninggun jaw ya nga ai. Dai majaw kun dinghku de ai ni mung madu tawn da sai ga sadi ni hpe ta tut hkan sa ra nga ai. Bai Karai Kasang hpe ap nawng daw jau da sai ni mung madu tawn da sai ga sadi ni hpe tut nawng hkan sa ai rai yang shi Madu ra sharawng ai Madu a hpang hkan kaja ai shi a ali ama ni tai nga na re.