Kahtawlik Nawku Hpung, Myitkyina Saradaw Ginwang hta magam gun nga ai Wa Saradaw hte wa jau ni a Myit Sumru Akyu Hpyi Hpawng, Zup Hpawng hte Sharin Hpawng hpe ( August 10 – 14 ) ya shani du hkra galaw taw ai rai nga ai.
Hkungran Sakramentu hte seng ai sharin hpawng hpe Yangon kaw na du lung wa ai Wa Jau Andrew Aung Kyaw Oo kaw nna sa du sharin, jahpra tsun sang lang dan nna tinang a Sasana kata na buga ginra masa hte htap htuk manu ai hku galaw sa mai na lam hta nawku hpung a tara u padi hte mung n htan n shai ai hku hkan sa mai ai lam ni tsun sang lang jahpra dan ai.
August praw 4 ya shani ang ai Wa jau ni a poi nhtoi hpe masa lam a majaw wa jau ni yawng n du hkum lu ai rai nna, August 14, 2026 ya jahpawt ( 6:30 ) aten St. Columban’s Cahtedral hta Wa Saradaw hte wa jau ni yawng hpung masha ni hte rau Missa Hkungga hpe jawm nawng nna Wa Jau ni a matu lak san Feasday poi hpe galaw la lu sai.
Dai jahpawt na Wa Saradaw John Mung Ngawn La Sam a mungga hta;
Madu Yesu gaw “Nanhte hpe ngai tsawra made ai zawn nanhte shada da tsawra nga mu” nga nna tsun ai.
Anhte gaw Madu Yesu hpe lata la ai n re, Madu Yesu she anhte hpe lata la ai rai nga ai. Dai re majaw awng dang lam hte anhte hkam la lu ai lam shagu gaw Karai Kasang kaw na lu ai re ngu ai hpe chye ra ai.
Anhte a sak hkrung prat hta awng dang lam hpe sha ra nga ga ai, ru yak jam jau lam ni hpe n ra ga ai re, raitim anhte kaja wa Madu Yesu hpe tsawra ai rai yang ru yak jam jau lam ni hkrum wa ai aten hta raitim Madu Yesu hpe tsawra ai myit hte dai mayak jam jau lam ni hpe lai di kau lu ai.
Mungkan lam hpe sha myit nna magam bungli galaw ai masha shagu gaw byin ai, ram ai, ningtawn ai masha ni hpe sha lata la ma ai. Raitim Karai Kasang gaw shi a magam gun na matu, shi a hpang hkan na matu shi hpe tsawra ai masha ni hpe sha shaga la ai, lata la ai. Dai majaw Madu Yesu Kasa Petru hpe nawku hpung a ningbaw hku nna lata la ai shaloi nang kade daram byin nni? nga nna n san ai, Petru nang ngai hpe tsawra ai nni? Nga nna she masum lang san ai.
Dai majaw Karai a magam gun ni mung mungkan a hpaji hparat, kung kyang ai lam ni hta gawng kya ai, ningra ai lam nga na re. Raitimung Karai a magam gun Wa Jau, Mama ni gaw Karai Kasang a shaman chyeju, Karai Kasang hpe tsawra ai myit shaman chyeju hte ndai magam bungli hpe galaw gun hpai taw ai rai nga ai.
Karai Kasang gaw shi hpe tsawra ai kadai hpe raitim, shi a hpang hkan ai kadai hpe raitim shi a mying ningsang hte hpyi ai chyeju ni hpe jaw ya ai. Dai re majaw ndai daram law ai wa jau ni hta byin ai ni mung lawm ai, gawng kya, ra rawng lam nga ai jau ni mung nga na re. Byin ai hpe mu ai shaloi Karai Kasang a chyeju hpe shakawn ga. N’gun yawm ai wa jau ni hpe mu ai shaloi shanhte a matu akyu hpyi ya ga. Kade mi ra rawng gawng kya ai lam nga ai raitim shi gaw mungkan ga na atsam marai hte Karai Kasang a hpang hkan ai n re hpe dum ra ai. Karai Kasang gaw shi hpe tsawra ai majaw, shi byin ai raitim, n byin ai raitim Karai Kasang jaw da ai mying ningsang hte nanhte a prat hta hpyi mayu ai lam ni hpe shi kaw nna Madu Yesu gaw shaman chyeju jaw ya ai.
