Daini na Ja Chyum Mungga hpe hti sumru yu ai shaloi e, Ahkyak dik ai tara lam hpe chye la lu ga ai. Madu Yesu a tara kanu lam hta tsawra matsan dum lama ai tara gaw, tara lam ni hta na kaba dik tara hte shawng ningnan No.1 anhte hkan sa ra ai tara nan re ai hpe Madu Yesu Hkristu gaw anhte hpe tsun shadum nga ai. Tsawra ai myit (love) ngu ai ga si langai mi gaw, lam mahkra hpe lachyum rawng nga ai. Jahtum chyalai Karai Kasang hpe myit masin mahkra hte, ninggun mahkra hte, nyan atsam mahkra hte tsawra ra ai.

Bai shi a kasha ni mahkra hpe mung, maren mara tsawra lu ai rai yang e, Madu anhte hpe  jaw da ai tara lam ni mahkra gaw, ndai tsawra ai tara lam hta nan lawm taw nga sai rai nga ai. Shingrai tawra myit hte, masha ni hpe akyu jaw na matu, lam madun ya na matu, mara raw ya na matu, chye madat ya na matu, ndai lam ni mahkra gaw, tsawra myit sha madung nan rai nga ai. Ndai lam ni hpe myit masin hta bang da hkan sa let, tara lam ni hpe hkan sa shakut nga ga law. Dai ni gaw, San pra ai Pius (10) a poi ninghtoi shani mung rai nga ai. San pra ai Pius a mying hpe la da ai ni yawng hpe mung kabu gara ai poi shani rai u ga ngu kyu hpyi ya dat ga ai law.