Hpyen yen ni the rau nga ai
73. Hpyen yen tsin-yam hkrum ai lam gaw Karai Kasang a Amyu masha ni a labau hta rau rai nga ai. Abraham gaw shi gara de sa wa ai hpe n chye ai sha hkawm sa wa ai; Mawshe gaw hkrun lam hkawm ai amyu masha ni hpe nam mali hku woi hkawm ai; Mari yan Yosep gaw ma Yesu hte rau Egutu mung de hprawng mat wa ma ai. “Shi a buga de du sa nna, shi a amyu masha ni shi hpe n hkap la ma ai” (Yhn 1:11) Hkristu shi nan, anhte a lapran hta manam langai zawn nga nga ai. Ndai lam a majaw, Nawku hpung gaw, htawt sit ai ni hta Madu a hkrung nga ai hpe galoi mung chye na ya nga ai rai nna, tara jeyang ai nhtoi hta, shi a hkra maga na ni hpe: “Ngai gaw manam rai nga yang, nanhte ngai hpe hkap hkalum la myit dai” (Mt 25:35) ngu tsun na re.
74. Tsaban 19 hta, wan hku law ai Uropa masha ni, grau kaja ai sak hkrung lam hpe tam na matu, htawt sit hkawm wa ai shaloi, htawt sit wa ai ni hpe lanu lahku ai lam hta, san pra ai masha kaba lahkawng, San John Baptist Scalabrini hte San Pra ai Frances Xavier Cabrini yan rai nga ai. Piacenza mare na Jau Scalabrini gaw, htawt sit nga ai ni hpe shanhte sa wa ai shara de hkan nang hkan sa na matu, wenyi, tara upadi hte arung arai lam ni hta garum shingtau ai lam ni hpe galaw na matu, San Charles a Sasana hpung hpe hpaw ninghtan wa sai. Shi gaw maigan mungdan hta zingri zingrat hkrum na hte makam masham sum mat na hkrit tsang hpa ni hpe sadi jaw let, kabu gara shiga hkaw tsun ai lam nnan hpe hkam la ai ni hku nna, htawt sit wa ai ni hpe mu mada ma ai. Madu shi hpe jaw ai charism hpe garum shingtau ai lam hta, “Scalabrini gaw, kadai mung maigan masha n re ai, pat shingdang ai lam n nga ai mungkan hte Nawku hpung hpe myit mada nga ai.” Italy mungdan kaw shangai wa nna, American mungdan masha langai mi rai nga ai, San Pra ai Frances Cabrini gaw, America mungdan a shawng ningnan lang, San Pra ai masha masat tang hkrum ai wa rai nga ai. Hpyen yen ni hpe garum ai lit hpe gun hpai na matu, Atlantic panglai hpe law law lang lai rap wa sai. “Shi gaw mau hpa nden marai hte laknak lang nna, bungli tam na matu mungkan nnan de shang wa ai matsan masha ni a matu, hpa n nga ai kaw nna jawng ni, tsi rung ni hte kanu kawa n lu ai ma ni a nta ni hpe hpaw hpang wa ai. Nta htinggaw ni, htawng ni hte lungseng htu ai shara ni hta shara jaw lai wa sai” 1950 ning Chyoi Pra ai Shaning hta Wa Sarabyin Pius XII gaw shi hpe Hpyen yen masha yawng a makawp maga ai num ngu nna ndau shabra lai wa sai.
