Daini na Ja Chyum Mungga hpe hti sum ru yu ai shaloi e, laika ka ai sara ni hte Hparishe ni hpe Yesu mara shagun ai lam na chye lu ga ai. Hkum gawng shingyan a matu tsawphtap lam (sh) hkum hkrang a matu san seng sanpan lam hta e, Myit masin kraw kata hta san seng na matu, myit jasat kaja na matu dai ni ndai chyum mungga hta kalang mi bai sharin ya taw nga sai. Anhte a n-gup aga kaw na tsun shaga ai ga si ga ngau ni gaw, kaga masha ni hpe hkra machyi ai lam n byin hkra sadi maja na gaw grai ahkyak la nga ai. Tara u padi tawn da ai hkan sa ra ai ngu ai gaw, masha ni sak hkrung nga pra sa ai lam ni hta, wang lu wang lang rai nga sa lu na matu rai nga ai.

Bai shada da kahkyin gumdin lu na matu, Karai Kasang hpe kam sham nga na matu, masha shada kanawn mazum lam, nga sa lai kyang kaja na matu hte tengman tara rapra na matu rai nga ga ai. Matu nna, nawku dawjau ladat ni, htunghking arawn alai ni mung prat hte maren kanawn mazum lam ni galu kaba wa ai lam ni mahkra mung, yat yat galai shai wa ai hta mahta nna, jahkrum bawng ban galai la nna, nga sa jahtuk la chye na mung grai nan ra ahkyak la nga ai hpe mu chye la lu ga ai. Dai re majaw, lahta e na la sai mabyin ni hpe, anhte ta tut hkan sa lu hkra shakut ga ngu hpaji jaw dat lu ai law.

Dai ni gaw San Joseph Calasanz hte San Louis yan a poi shani mung rai nga ai. Shing rai ndai San pra yan a mying hpe la da ni yawng hpe kabu pyaw ai poi shani rai mu ga ngu shakram dat ga ai law.