August 26, bat masum ya shani, Wa Sarabyin Leo XIV gaw, ‘Sacrosanctum Concilium’—Vatican zuphpawng a 1963 ning na Chyoi Pra ai Nawku Hpung a nawku daw jau ai lam hte seng ai Tara Upadi hte seng nna, makam masham sharin shaga ai lam hpe tsun shaga lai wa ai. Shi gaw, zuphpawng Nawku daw jau ai lam hpe gram lajang ai lam a madung yaw shada ai lam gaw, kam sham ai hpung masha ni hpe, myit n lawm ai, atsin sha yu nga ai ni kaw na tsan gang shangun nna, shanhte hpe atsam rawng ai, myit lawm hkum lawm ai hku shang lawm lu shangun ai, dai hku nna Karai Kasang hte shanhte a hkum hkrang hku hkau lam hpe grau sung hkra galaw ya ai lam re, nga nna ahkyak shatai tsun shaleng dan ai.
Wa Sarabyin a mungga kaw na ahkyak ai lam ni gaw;
Hkrung nga ai htunghking hta ru jung ai lam: Nawku daw jau ai lam hpe gram lajang ai lam gaw, akajawng sha byin pru wa ai lam n re; lai wa sai tsaban 20 na Wa Sarabyin ni (Pius XI, Pius XII, John XXIII zawn re ai ni) matut manoi shakut shaja ai hte npawt nhpang hpe gawgap da ma ai. Ndai hkrung nga ai htunghking hpe chye na ai gaw, npawt tara ni hpe grai n-gun dat ai (sh) chye na shut ai hku galaw ai, zingri zingrat ai lam ni hpe zuphpawng ngut ai hpang sharai la na matu karum ya nga ai.
Jau ni hte Kabu Gara Shiga hkaw tsun ai ni a lit: Nawku daw jau ai lam gaw Nawku hpung ting a laksan n re ai poi ni rai nga ai. Jau ni hte Deacon ni gaw, “noble simplicity” hte nawku daw jau ai tara ni hpe hkan sa na lit nga ai, dai majaw nawku daw jau ai lam hpe kabu gara shiga hkaw tsun ai hte kahkyin gumdin lam a matu madung ladat langai hku nna galaw nga ai.
Shinggyim masha hte Karai Kasang a shamu shamawt lam: 1962 ning hta Cardinal Giovanni Battista Montini (hpang e Wa Sarabyin Pawlu VI) a laika hpe lakap nna, Wa Sarabyin Leo gaw, wenyi lam gaw hkum hkrang hte bung ra ai ngu ai hpe madi madun da nga ai. Liturgy gaw shinggyim masha hte Karai Kasang hpe matut mahkai ya ai Karai Kasang hte hkrung nga ai ga shaga ai lam rai nga ai.
Aten hte maren galai shai ai lam: Liturgy gaw hkrung nga ai daw jau lam langai mi re majaw, Nawku hpung gaw Karai Kasang kaw nna hpaw tawn da ai, n galai shai ai lam ni hte aten ladaw hte maren galai shai ra ai shinggyim masha ni a lam ni hpe garan ginhka ya nga ai. Htung lailen ni hpe gram lajang ai hte buga ga ni hpe jai lang ai gaw chyoi pra ai laika ni hpe hti lu hkra galaw ya ai majaw, buga masha ni hkye hkrang la ai lam a makoi magap da ai lam hpe atsawm sha chye na la lu ai hte, shang lawm lu na re.
