Daini na Ja Chyum Mungga hpe hti sumru yu ai shaloi e, kang ka ai shangun ma hte n kang ka ai shangun ma a lam na lu ga ai. Tinang a Madu wa bai du wa na hpe tut e sadi maja let, ala nga ai mayam wa gaw, A lu ai wa rai nga ai nga nna, tsun da nga ai. Anhte ni a prat hta e mung, Madu Yesu gaw aten n lata ai sha, marai langai ngai a hkrang nsam hte du sa na ra ai hpe sadi ra nga ga ai. Shingrai anhte Yesu Hkristu a hkum sai shan chyoipra hkum hkam la ai shaloi e mung shi madu nan du sa ai re. Hpang jahtum na ninghtoi hta she du sa na n re.

Anhte ni a shani shagu na sak hkrung nga sa ten ni hta, bai anhte a magam bungli shara ni hta, hkringsa nga ai aten ni hta, dum nta masha ni yawng jawm pawng let akyu hpyi nga ai ten ni, bai kaga masha langai ngai, (sh) anhte n ra ai wa langai ngai, (sh) kaja ai laika hti nga ai aten, madu myit ru shoihpa hkrum nga ai ten ni zawn re ai shaloi e, Madu Karai gaw anhte kaw du sa wa nna, anhte hte a rau sha nga nga ai hpe myit dum kam hpa nna, shi kaw na shaman chyeju hkam la ga law. Anhte ni mung kangka ai shangun ma tai nga lu hkra shakut sa ga law. Shiga madat nu wa ni dai ni gaw, San Monica a poi ninghtoi mung rai nga ai. San Monica mying ai ni yawng hpe ngwi pyaw kabu gara ai poi shani rai mu ga ngu shakram dat ga ai.