La shaw num shaw ai hku hkau lam hpe mara shagun na matu nden marai nga na kun? Nang galaw ai lam a majaw byin wa na akyu hpe teng sha myit yu nna grai myit sumru na re. Shing nrai, nang hpe mara shagun na (sh) sat kau na pyi hkrit ai majaw, dai hpe ninghkap tsun na matu nden marai n nga na re.

Kashin kamun Sara Yawhan gaw Hkawhkam Herod hte Herodia a num shaw ai hku hkau lam hpe ninghkap tsun shaga na hpe n hkrit ai majaw nden marai nga ai wa re. Yawhan gaw, Herodia gaw shi a kanau Hpilip hte hkungran ai majaw, dai hku hkau lam hta shanhte nga na matu shut ai lam tsun shadum ai. Raitim, akyang lailen hte teng man ai lam ni hpe tsun ai majaw, Yawhan hpe htawng jahkrat nna, hpang jahtum hta baw daw kau ya ai.

Anhte a prat hta n kaja ai, n hkru n kaja ai lam ni hpe ninghkap ai hku tsap ra ai (sh) tsun shaga ra ai aten du wa ai. Ndai lam hku nna sha kaga masha ni galaw nga ai bungli hta hpa n kaja ai hpe chye shangun na re majaw re.

Shut ai lam hpe ninghkap ai hku atsin sha nga na gaw galoi mung lata la mai ai lam n re hpa majaw nga yang anhte atsin sha nga yang shut ai lam hpe gara hku shading sharai lu na kun? Anhte atsin sha nga yang, kaga ni shanhte galaw nga ai gaw shut ai hpe gara hku chye na na kun? N kaja ai lam  nchye ai zawn galaw nna, n kaja ai lam n mu ai zawn galaw yang, shut ai lam hpe myit hkrum ai zawn rai nga ai.

Dai majaw anhte tsun shapraw ra ai ndai gaw anhte pawt na hte jahtau garu ai lam ni nga na ngu ai lachyum n re. Anhte mara nga ai ngu hkam la ai ni hpe mung shawa hku tsun shaga mai ai. Ahkyak ai gaw anhte tsun shapraw nna kaga masha ni galaw ai lam hpe anhte n myit hkrum ai lam hpe chye shangun ai.

Anhte mung Yawhan Baptista zawn, shut ai lam shagu hpe mara shagun na matu nden marai nga ga. Anhte gaw, myit lawm ai masha langai hkrai/ ni hpe, arawn alai hte tsun shaga nna, anhte gaw shanhte hta grau chyoi pra ai, n-gun ja ai, grau ai ngu ai hpe n tsun ai sha, ndai lam hpe galaw lu na re.