Daini na akyu hpyi sumru yu na ga baw hpe: “Identity of the Heart, Na salum a masat dasik,” ngu nna la ga.
Shawng nnan Chyum mungga hpe madat la ga, “Ngai nang hpe mying hte shaga nngai, nang gaw nye a rai nga ndai,” nga nna Esaia 43:10 hta mu lu ai.
Ngai kadai a kasha re kun myit sawn yu ga? Anhte law malawng gaw, “Ngai kadai rai ta?”
Anhte masha ni gaw tinang kadai re ai ngu hpe sha chyen ai shaloi, daw dan ai shaloi, lachyum shapraw wa ai shaloi, tinang a kanu kawa, sutgan ja gumhpraw ni, arawng sadang ni hterau anhte a hkrat sum mat ai lam ni hta mahta nnga “ngai” dai lauban wa re, dai wa a kasha re nga nna mung, hkrat sum ai a masha myit kaji nga ai masha wa mung ngai wa mi gaw ntai nmai sha she re nga nna mung daw dan lachyum shapraw chye nga ga ai. Anhte kadai re ai hpe chye na matu wa she laga masha ni anhte hpe gara hku dawdan ai sawn ai kun nga shawng she yu nna dawdan chye ga ai. Masa lam nkau mi hku nna mung, prat pat da hkrum ai (sh) lu la ai atsam jinghka ni hku nna mung tinang kadai re ai hpe dawdan na ahkang jaw kau chye nga ga ai. Anhte gaw lam shagu hpe hkam tam yu let, tinang kadai re ai hpe daw na matu shakut nga tim, anhte kadai re ai hpe chye lu ai ahkyak dik re Karai Kasang hta mahta na hpe malap kau chye nga ai. Shi hta sha anhte kadai re hpe atsawm sha lu chye nga ai. Dai gaw “hkum hkrit, ngai nang hpe shaga la ni ai, nang gaw ngai a matu rai nga ai,”nga nna Myi htoi wa Esaia hku nna tsun ai hpe dum ga.
Bai 1 Yawhan 3:1 hta “Karai Kasang a kashu kasha ni anhte hpe ngu shamying mi ai majaw, Kawa gaw anhte hpe kaning re ai tsaw ra myit madun da mi ai hpe yu mu: dai hte maren anhte rai nga ga ai,” nga nna tsun da nga ai. Bai nna Ehpesu 2:19 hta chyum laika hta, “Dai majaw nanhte gaw maigan masha ni n rai, chyoi pra ai ni hte mungchying sha ni rai nga myit dai, Karai Kasang a nta masha ni rai nga myit dai” nga nna tsun da nga ai. Ndai chyum ga ni gaw anhte kadai re ai hpe shadum ai ga ni re nga ai.
Anhte a masat dasik hpe bai gram lajang ra ai. Karai Kasang a mungga hpe yu nna, shi tsun ai hpe anhte gaw teng sha hkum tsup ai hku kam sham na matu lata la ra ai. Anhte a Hpan Madu hpe nan shi a hpan da ai lam hpe tsun dan shangun ra ai. Nang hpe shi a kasha ngu shaga ai Karai Kasang hpe nang daw jau nga ai. Nang galaw ai lam kaja ai, n kaja ai, awng dang ai, hkrat sum ai hpe n sawn ai sha, nang gaw shawng nnan hta Tsaw Htum ai Karai Kasang a hkye hkrang la hkrum ai kasha rai nga ai. Chyum Laika hta rawng ai tengman ai lam hta na a masat dasik hpe ngang ngang jum tek da na aten rai sai.
Chyum Laika hta tsun da ai hpe chye ai hte sha n’mai ai hpe nang mung chye nga ai. “Anhte hpe Karai Kasang a kashu kasha ni ngu nna shamying ging ai, anhte mung kaja wa sha Karai a kasha ni rai nga ga ai” ngu ai zawn re ai chyum daw ni hpe hti dan lu ai hte sha nlaw nga ai. Na a myit masin kata hta Chyum Laika a tengman ai lam hpe kam sham ai aten du hkra re jang she, nang manu shadan dik ai lam hpa hpe raitim, na a prat tup hpe dai kaw madung tawn na re nga ai. Karai Kasang a mungga hta shinggyim masha a ningmu hpe manu shadan ai rai yang, na a masat dasik gaw kaga masha ni a aten kadun hte galai shai chye ai ningmu ni hta madung tawn na re. Nang kadai re hpe lachyum shaleng na matu na a masa lam ni hpe yu yang, aten ladaw ni lai wa ai hte maren na a masat kumla mung galai shai wa na re. Raitim, na a myit masin hta kam sham ai masat kumla gaw Karai Kasang a tengman ai lam hta madung tawn ai rai yang, na a manu dan ai lam, ningmu, dawdan ai lam, kam sham ai lam ni gaw n-gun rawng ai sha n ga, law htam ai asak hpe mung jaw ya lu na re.
Dai ni aten la nna, na a myit masin hpe jep joi yu u. Na a makam masham hpe teng man ai hku yu u. Nang na masat daik hpe gara kaw tam nga ai kun? Na a myit masin a masat kumla gaw na a Hpan Madu kaw na pru wa na re ngu ai Karai Kasang a mungga a tengman ai lam hpe kam hpa nga u.
Ya, asim sha nga nna sumru yu nga ga,
1. Na a masat dasik a tengman ai lam hpe myit sumru yu u. “Hkum hkrit et, ngai nang hpe hkye hkrang la ni ai, amying hte ngai nang hpe shaga ni ai, nang nye a rai nga ndai”nga nna Myihtoi Esaia 43:15 hta mu lu nga ai.
2. Nang kadai hpe lachyum shaleng na ahkang jaw nga ai kun? Na a myit masin kata hta, Chyum Laika a tengman ai lam hta grau nna hpa hpe manu shadan ai kun?
3. Hkristu hta nang kadai re ai hpe chye na matu Chyoi Pra ai Wenyi kaw hpyi nem u. Karai Kasang a ningmu a tengman ai lam hpe hpaw dan lu na matu, na a myit masin hpe Karai Kasang hpang de hpaw ya u. Na a makam masham hpe Chyum Laika a tengman ai lam hte maren nga sa nga u.
Anhte a myit masin hpe tengman ai hku jep joi yu na matu grai ahkyak nga ai. Nawku jawng sa ai, Chyum Laika hpe tsun shaga ai, Karai Kasang a mungga hpe hti ai ram sha gaw nlaw nga ai. Na a myit masin kata de teng sha shang wa ai, na a prat hpe galai shai shangun ai lam hpe yu yu u. Na a prat—na a hkam sha lam, galaw ai lam, kam sham ai lam ni—Karai Kasang a tengman ai lam hte n’htap htuk ai aten du hkra nre shi jang, shi madu hpe tam ai hpe hkum hkring sa et. Karai Kasang nang a matu lajang da ya ai asak hkrung lam hpring tsup ai hpe tam na matu n-gun atsam hte n-gun nnan lu la u ga.
Shiga madat nga ai ni yawng hpe Chyoi Pra ai Wenyi, Shi a simsa ai chyeju jaw ya nna tut e bau sin nga u ga law!