Dai ni na Ja Chyum Mungga hpe hti sumru yu ai shaloi e, lu sha gam ai shaloi hte akyu hpyi ai shaloi hkan sa ra ai lam ni hpe na chye lu ga ai. Dai ni na mungga gaw, Madu Yesu la sa wa ai tara ningnan, asak ningnan hte bai hkrung rawt wa ai lam ni hpe, Yuda masha ni lu hkap la na matu hkaw tsun ya nga sai. Madu Yesu a chyeju kumhpa gaw, atsam rawng nga ai. Shut hpyit mara hta pyaw len taw nga ai anhte ni a prat dingsa hpe ladat ningnan, asak ningnan, prat ningnan hpe kalang mi bai ningnan hpang ya ai lam mung rai nga sai.

Dai zawn sha Madu Yesu la sa ya ai Sabyi ntsin ningnan hta, Kawa Karai Kasang gaw, prat nignan hpe bai shagrin da ya ai rai nga ai. Anhte yawng hte mung, Madu Karai la sa ya ai htani htana asak hpe lu la shangun mayu nga ai. Dai majaw Sabyi ntsin hpe lu ai shaloi e, myit hta kabu pyaw ai hpe hkam sha lu nga ai zawn, Madu Yesu hpe hkap la kam sham ai rai yang, prat dingsa e Madu Karai Kasang kaw na chyeju kumhpa law law hkam la lu na teng sha rai nga ga ai hpe gaw, kam shut shara n nga ai. Dai majaw, shi hkang da ai lam ni hpe hkan sa let, kaja ai Hkristan hpung masha langai mi byin tai lu hkra shakut sa ga law.