Daini na Ja Chyum Mungga hpe hti sum ru yu ai shaloi e Madu Yesu a ahtik labau hte Yesu Hkristu shangai wa ai lam ni hpe na lu ga ai. Dai ni gaw Hkyela Madu Yesu a kanu NU Maria a shangai ninghtoi poi shani rai nga ga ai law. Shinggyim masha a labau hta, Madu Karai du sa wa na matu, Nu Maria kaw nna hpang wa ai rai nga ai. Ya dai ni anhte Myanmar mungdan ting hta e mung, Nu Maria a shangai poi ninghtoi a matu Novena hte arau wu wu di di galaw nga ga ai re. Maria a shamai shatsai ya ai chyeju ni hpe mung masha shagu hkam sha lu nga ga ai. Myanmar hte mungkan ting hta e mung, majan hte shingra tara ni a majaw, masha ni si hkrum nga ai.

Dai majaw anhte shinggyim masha ni tinang tsawra ai nta masha ni hte hka bra ra ai. Tinang lu ai sutgan rung rai ni sum mat nna, myit ana ni lu mat ma nga ai. Shingrai myit a ningma ni, hkum hkrang a, wenyi lam yan ni a ningma ni hpe tsi lajang ya lu ai Nu Maria kaw sit shang sa ga. Nu Maria kaw hpyi ai akyu hpyi ga ni hpe ningdang kau ai lam n nga ai. Anhte kashu kasha ni a ra kadawn ai lam hpe tut garum ya ai Nu Maria kaw kam sham, shagrit shanem ai myit hte dai chyeju ni hpe hpyi la nga ga law. Dai chyeju hkam la ngut ai hpang e mung, dai chyeju ni hpe bai garan gachyan ya ga. Nu Maria a shaman chyeju gaw, anhte hpung masha shagu a ntsa hta e, tut a grin nga nga mali ga law.