Daini na Ja Chyum Mungga hpe hti sumru yu ai shaloi e, tinang a hpyen wa hpe tsawra matsan dum ra ai lam na chye lu ga ai. Tawra ai nu wa ni, dai ni na chyum mungga hta e, hpyen wa hpe tsawra na lam Madu Yesu saw shaga nga ai. Tinang hpe akyu jaw ya ai wa hpe tsawra na, mara raw ya na ngu ai gaw, loi la ai raitim, dai zawn galaw ai lam ni hta e, akyu chyeju n lu la nga ai. Tinang a hpyen wa, madu n ra sharawng ai wa, bai mara n lu raw ya ai wa, tinang n lu hkap la ai wa, madu hte myit masa jahkrum bawng ban la na yak ai wa hpe tsawra na, mara raw ya lu na matu mung Madu Yesu gaw, anhte yawng hpe saw shaga taw nga sai. 

Yawng hpe garan ginhka n nga ai sha, tsawra myit tawn da na matu myit jasu ya nga ai. Dai zawn hkan galaw ai rai yang e, akyu chyeju kaba la nga ai. Bai kaba dik htum ai Karai a kashu kasha ni byin na ahkaw ahkang lu la na rai nga ai. Ndai mai kaja lam hpe hkan sa shatup na matu yak la nga ai majaw, hkam la lu na chyeju kumhpa mung kaba la nga ai. Shingrai anhte yawng Madu a kashu kasha ni byinnga na matu tut nawng shakut sa ga law. Shaloi jang Madu a kashu kasha majing anhte tai wa na re.