Dai ni na Ja Chyum Mungga hpe hti sumru yu ai shaloi e, kaga masha hpe hkum jeyang mu nga ai lam hpe na chye lu ga ai. Ya dai ni sumru dinglik yu ra na lam gaw, anhte yawng gaw mara lu ai ni hkrai sha rai nga ga ai. Tinang a mara ni hpe mu chye nna, hkap yin la ai rai yang, kaga masha ni hpe mung, chye na masam maram ya lu nna, jeyang daw dan na n rai nga ai. Dai zawn sha tinang a mara hpe Karai Kasang gaw raw kau ya mayu ai rai yang, kaga masha ni a mara hpe mung raw dat ya ra nga ai re. Anhte ni gaw, tara agyi galaw mayu nga ma ai.

Rai yang e, teng man ai tara agyi gaw, Madu Yesu sha rai nga ai. Dai majaw, Madu Yesu chyu sha anhte hpe jeyang daw dan na ahkaw ahkang nga ai. Madu Yesu chyu sha anhte a mara ni hpe shi Sai hte kashin kau ya ai majaw, shi hkum nan sha mara raw dat kau ya ai hte daw dan ya na ahkaw ahkang lu ai wa mung re. Anhte shut hpyit mara lu ai ni kaw nna, Madu Karai a matsan dum lama ai hte sha gindan na matu anhte ni grau grau nna, shakut shaja sa ra nga ga ai.