Ma langai hpe manu dan ai lam ni hte sharin achyin ya let, kanu kawa ni sak hkrung nga ai shaloi, shi gara hku byin wa na kun? Ma gaw kaja ai hte Karai Kasang hpe tsawra ai wa tai kaba wa na re. Ma langai hpe kanu kawa ni atsawm sha sharin achyin ya ai shaloi, ndai lam gaw galoi mung byin wa ai.

Maga mi hku nna, ma langai hpe kaja ai akyang lailen ni hte n sharin ya ai sha, kanu kawa ni mung dai zawn re ai akyang lailen ni hpe n hkan sa ai rai yang ndai ma gaw, manu dan ai lam ni hpe n kaja ai hku mu mada ai myit hte kaba wa na rai nga ai. Shi hpe dai lam hpe n sharin ya ai (sh) kanu kawa ni sak hkrung nga ai hpe n mu tim asan sha re ai lam rai nga ai.

Ndai laban shani na kabu gara shiga hta Yesu shi a sape ni hpe tsun ai gaw: “Kaja ai hpun gaw asi kaja si lu ai, hpun shagu gaw tinang a asi hte chye ginhka lu nga ai (Luka 6:43-44).Kaja ai hpun gaw kanu kawa rai nna, kaja ai asi gaw shan a kasha rai nga ai.

Anhte a ma ni hpe anhte sharin ya ai kaja ai lam hpa hpe raitim, shanhte hkam la na re ngu Yesu tsun ai. Bai nna, anhte a ma ni hpe anhte galaw nna sharin ya ai kaja ai lam ni gaw, shanhte a lung seng zawn ngang kang ai akyang lailen npawt nhpang a daw kaba langai mi hpe shabyin ya na re.

Dai ni na prat na kanu kawa law malawng gaw galoi mung bungli law ai ni rai nga ga ai. Karai Kasang hpe tsawra ai lam hta grau nna, kaja ai akyang lailen ni hpe ma ni hpe sharin ya na aten nau n nga ai. Dai majaw shanhte gaw ma ni hpe gara hku bau maka nga ai kun? Karai Kasang hpe manu shadan ai lam hte tsawra myit n nga ai ma ni rai nna ndai lam a matu kadai hpe mung mara n shagun ai sha kanu kawa ni hpe sha mara shagun mai nga ai.

Kaja ai manu dan ai lam ni hte Karai Kasang hpe tsawra ai lam ni hpe na a ma ni hpe naw sharin ya nga ai kun? Nang mung dai hte maren sak hkrung nga ai kun?