Daini na Ja Chyum Mungga hpe hti sumru yu ai shaloi e, Mahte hpe Madu Yesu shaga la ai lam hpe chye lu ga ai. Ya daini na kabu gara shiga hta e, Madu Yesu gaw ndai mungkan ga ntsa de yu sa wa ai lam a lachyum hpe e, asan sha tsun madum dan nga ai. Machyi ai masha ni tinang a dum nta kaw, bum tsi, mungding tsi ni hte lu sha tsi lajang yu nna, mai tsai wa ai lam n nga yang, tsi sarawun ni kaw sa tsi ma ai. Ya dai ni e ja gumhpraw lu su ai ni gaw, maigan ga de pyi sa tsi hkam la ma ai re.

Madu Yesu gaw kang hta ai ni, mara kap ai ni hte ni ni htep htep gayau nga ai hpe e, Hparishe ni gaw, mara jaw tsun jahpoi nga ma ai. Dai majaw Madu Yesu gaw, mara lu ai ni anhte yawng hpe hkye hkrang la na matu, du sa wa ai re. Raitim anhte ni gaw grau nna, mara galaw nga na matu n re. Mara galaw chye ai anhte ni a myit jasat lai kyang ni mahkra hpe tsi shamai kau nna, tinang hkum nan lajang da ai sumsing mungdan de du lu na matu, ndai mungkan ga kaw naw nga nga ai aten ni hta e,  mungkan ga na ahkying aten ni hpe akyu pru ai hku jai sung lang lu hkra shakut sa wa ga law.