Nawku hpung a shinggyim nga pra masa sharin achyin ai tsaban langai
82. Lai wa sai tsaban lahkawng hta hpaji masa hte shinggyim nga pra masa galai shai wa ai lam ni lawan ladan byin wa ai gaw, nhtan shai ai lam ni, manghkang ni yawng hte rau, matsan masha ni a prat hpe hkra machyi shangun ai sha n-ga, shanhte maga de mung, bawngban hpawng, myit sumru ai lam ni byin wa sai. Bungli galaw masha ni, num ni hte ramma ni a shamu shamawt lam amyu myu, amyu garan ginhka ai lam hpe ninghkap gasat ai lam ni gaw, shinggyim wuhpawng a shingdu kaw nga ai ni a sari sadang hpe manu shadan ai lam nnan byin shangun ai. Nawku hpung a shinggyim nga pra masa the seng ai sharin shaga lam mung ndai kaw nna pru wa ai rai nga ai. Dai ni na prat na shinggyim nga pra masa, bungli masa, sut masa hte htunghking masa ni a masa hta Hkristan hpaw shadan dan ai lam hpe sawk sagawn ai lam gaw, shanhte a aten na manghkang kaba ni hpe hkam sharang nga ai, num la ni yawng a garum shingtau lam n lawm yang, n mai byin na re. Shanhte a makau kaw, lam nnan de rawt jat wa nga ai Nawku hpung hpe hkrang shapraw ai nawku htung hkan ai num la ni nga ai. Ya anhte hkrum sha nga ai epochal galai shai lam gaw, kam sham ai ni hte Church’s Magisterium lapran, mung shawa masha ni hte hpaji ninghkring ni a lapran, masha langai hkrai hte wuhpung wuhpawng ni a lapran, tut nawng matut mahkai lam hpe grau nna ra kadawn shangun nga ai. Ndai shara hta mung, tengman ai lam hpe shinggan kaw nna yu yang kaja dik htum rai nna, matsan mayan ni gaw Nawku hpung hte shinggyim wuhpawng ting a matu n mai malap ai laklai ai myit sawn sumru lam ni hpe lu da ai hpe kalang bai hkap la ra ai.
83. Lai wa sai shaning 150 ning laman na Church’s Magisterium gaw matsan mayan ni hte seng nna ahkyak ai sharin achyin ai lam ni a tengman ai sutgan rai nga ai. Sarabyin ni gaw, nawku hpung a chye na hkawn hkrang ai lam hku nna, gram lajang ai ningmu nnan ni hpe nsen shapraw ma ai. Ga shadawn hku nna, Leo XIII gaw shi a Encyclical Letter ‘Rerum Novarum’ hta bungli galaw ai lam hte seng ai ga san hpe tsun dan nna, bungli galaw masha law law a hkam sharang n lu ai sak hkrung lam hpe madi madun let, tara rap ra ai shinggyim nga pra masa hpe gawgap na matu tsun shadut wa sai. Kaga Sarabyin ni mung ndai ga baw hte seng nna tsun shaga ma ai. San Yawhan XXIII gaw, shi a Encyclical ‘Mater et Magistra’ (1961) hta, mungkan ting hta tara rap ra lam hpe tsun shadut da ai: sut su ai mungdan ni gaw, kawsi hpang gara ai hte grai matsan ai mungdan ni hpe n mu mada ai sha nga lu na n rai sai; de a malai, shanhte a sutgan yawng hpe garum shingtau na matu shaga la hkrum ma ai nga nna tsun shadum lai wa sai.
