Daini na Ja Chyum Mungga hpe hti sum ru yu ai shaloi e, Yesu a lam Herod tak yu ai mabyin lam hpe na la lu ga ai. Dai ni na chyum mungga daw hta e, Herod hkawhkam wa a myit shoi shi shap myit ung ang taw nga ai hpe mu lu ga ai. Dai zawn myit ung ang nga ai gaw, tup hkrak nan n chye ai majaw rai nga ai. Dai mabyin gaw n tsang, tsang madang power ahkang lu ai ni gaw, lawu tsang kata hta na mabyin lam ni mahkra hpe pu pu le le n chye ai majaw nan rai nga ai. Kaga masha langai mi bai tsun dan ai hpe sha chye lu ai nga ma ai re.

Raitim Chyoipra ai wenyi lam woi sa ai hpe hkam la lu ai rai yang, myit ung ang na lam hpa n nga ai. Hpa majaw nga yang e, chyoi pra ai wenyi gaw, shut ai jaw ai, mabyin lam mahkra hpe hparan lu hkra sharin ya na rai nga ai. Herod hkaw hkam wa gaw, mungdan hpe up hkang ai raitim, shi hpe kadai wa e mung sadi run na n rai. Dai zawn sha Shi hpe kadai wa mi sat na matu gyam na kun nga myit ru ai hte, sak hkrung nga ra ai. Raitim shi chyoi pra ai wenyi hpe kam hpa ai rai yang, myit shoi shi shap, ung ang ai lam ni nga na n rai. Dai majaw anhte yawng mung chyoi pra ai wenyi Kara Kasang kaw, tut nawng kam hpa shingbi n na, nga sa ai rai yang, lam shagu hta, myit ru n ra, awng dang lam ni lu la na rai nga ga ai.