Daw (I) Esa 5, 1-7;

Daw (II) : Phil 4, 6-9

Kabu gara Shiga – Mtt 21, 33-43

Daini gaw, October shata hta shawng nnan na Laban shani rai nna, ndai Laban shani hta, Karai Kasang anhte hpe shi tsawra ai shi a tsabyi sun hpe woi awn na matu lit shatsam da ai majaw, chyeju hkam la lu ai majaw kabu gara nga na matu, nawku hpung gaw anhte hpe hkang da nga ai. Dai majaw shi a lit hpe atsawm sha gun hpai lu na matu, Karai Kasang a simsa lam hpe anhte hte grau grau ni htep hkra galaw ya ai akyu hpyi ga law law ra nga ai. Ndai lam hpe yu nna anhte hpe lit shatsam da ai Karai Kasang hpe myit pyaw shangun na matu (anhte a kaji kawa ni galaw ai zawn) anhte a kaja dik htum hpe jaw ra ga ai.

Daw 1 hta masha law law chye ai “tsabyi sun a ga shadawn (sh) mahkawn gaw ga shadawn langai mi rai nga ai.Ndai hta Karai Kasang gaw Yuda hpe shi a tsawra myit hte lanu lahku ai lam hpe bai tsun dan ai.Shi gaw shi hpe ja magaw si zawn lata la ai (Zak 2, 8) hte shi a tsawra ai sun hku nna, shi hpe shim lum hkra galaw na matu mai byin ai lam yawng hpe galaw ya ai.

kaja ai atsam ningja: “Shi gaw tara rap ra ai lam hpe myit mada tim, du daw sai hkaw ai lam, tsin-yam tsindam a hkrap ngu hkrap ngoi ai hpe sha mu mada ai.” Anhte gaw gara hku matsan dum chye ai kun?Law malawng hta anhte tsawra ai wa hpe shi a hkra machyi ai lam yawng a matu chyeju n chye dum ga ai. Daini na anhte a mungkan gaw, zingri zingrat ai lam, dip up sha ai lam, kawsi hpang gara ai lam, dum nta nlu ai lam, myit marin ai lam, dan dawng ai hku jai lang ai lam, n tara ai lam etcetera ni hte masat da hkrum nga ai.

Anhte gaw htingbu ni hpe lanu lahku ai hta, htingbu ni hpe dut shabra ai lam hpe grau nna myit tsang ra nga ai. Anhte grau kaja hkra galaw ra ai hte Karai Kasang mung grau kaja hkra galaw na matu myit mada nga ai. Kaja wa myit n pyaw hpa, yawn hpa gaw, tara rap ra lam a malai, Karai Kasang gaw zingri zingrat ai lam hpe mu nga ai; bai nna, dinghpring ai a malai, tsin-yam tsindam hkrum ai ni a hkrap ngu hkrap ngoi ai hpe Karai Kasang na ya nga ai. Dai majaw Shi a sun hta, anhte hpe shi kaja ai hku galaw ya ai raitim, anhte gaw Shi hpe myit daw shangun na kun?

Daini Hpilipi masha ni hpang de ka dat ai hpang jahtum na laika hta Pawlu gaw anhte hpe myit ru myit tsang ai lam n nga na matu n-gun jaw da nga ai hpa majaw nga yang anhte gaw akyu hpyi ai hku nna tsabyi sun Madu hte matut mahkai nga yang shi a simsa lam anhte hte rau nga nga na ahkang jaw na re. maga mi hku tsun ga nga yang akyu hpyi ai hku nna Karai Kasang a simsa lam hpe galoi mung tam ra ai. Hpang jahtum, Karai Kasang anhte hta mu lu na matu myit mada da ai madung lam ni, shi a tsabyi sun de anhte a myit hpe shadut ya ai: “Tengman ai lam yawng… arawng lu ai lam yawng…anhte tsawra nna hkungga lara ai lam yawng mayawng….”

Dai majaw, hpa hpe mung hkungga ging ai ngu ai lachyum gaw, hkungga ging ai hpe tsun mayu ai rai nna, dai zawn re ai lam ni hpe sha myit yu ra ai. Dai gaw hpa mi rai rai, Karai Kasang a dinghpring ai lam a hkum tsup ai madang hte maren rai nga ai. San seng ai lam gaw, awu asin n nga ai, tsawra myit rawng ai lam gaw, kaga masha ni hpe shi a yaw shada lam hte galaw ai lam ni hta myit pyaw hpa lam rai nga ai. Kaja ai hpa rai tim, shakawn ging ai lam rai nga ai.

Myit malai lu ai lam gaw, ndai lam langai sha rai na re, anhte law malawng gaw, Chyum Laika hta lawm ai tengman ai lam ni hpe myit yu na matu n re ai sha, bat shagu na wenyi shabrai lu la na matu, Karai Kasang anhte hte rau naw nga ai ngu hkam sha na matu, nawku jawng de sa ai lam rai nga ai. Karai Kasang a simsa lam anhte hta matut nna nga nga lu na matu, Yesu Hkristu a kabu gara shiga kaw nna anhte sharin la lu ai lam yawng hpe matut galaw sa wa na matu Pawlu tsun nga ai. Dai hku galaw yang, tsabyi sun madu gaw anhte hpe myit daw myit hten ai lam n galaw ai majaw, anhte hte rau matut nna kabu gara nga na re.

dai ni na kabu gara shiga hta shawng na daw 1 zawn, tsabyi sun ga shadawn langai mi hpe mu lu ai. Hparishe ni hte Laika ka ai sara ni hpe n kaja ai hte n hkru n kaja ai nta madu ni hku nna madun dan nna, kaja ai hku tsun dan na malai, nta madu hpe jahkrat kau na matu dawdan ma ai. Ga san gaw, ndai n hkru n kaja ai sun galaw ai ni hpe shapraw kau ngut ai hpang, kadai hpe tsabyi sun jaw na (sh) jaw kau sai kun? Ndai Laban shani anhte a matu kabu gara shiga gaw ndai kaw rai nga ai: “….dai sun hpe kaga sun galaw ai ni hpe htingrai htingrat ya u, shanhte gaw shi du wa ai shaloi, shi hpe nsi nai si ni hpe ap ya na re.”

Dai majaw ndai ga shadawn gaw, Karai Kasang hte shi a amyu masha ni hpe gara hku kanawn mazum ai lam hte seng nna ahkyak ai tengman ai lam hpe tsun dan nga ai. Langai, Karai Kasang a gam jaw gam ya ai lam hte kam hpa ai lam hpe tsun dan ai. Lahkawng, Shi a myit galu kaba ai lam hte tara rap ra ai lam hpe tsun dan nga ai. Teng sha nga yang ndai ga shadawn gaw Hparishe ni hpe myihtoi ni hpe sat kau ai hte Karai Kasang a kasha Hkristu hpe mung sat kau na re ngu ai hpe shadum na matu sha rai nga ai.

Raitim, shawng nnan na nta htinggaw ni hpe tara jeyang ai lam gaw, anhte nta htinggaw nnan ni hpe sadi jaw ai lam rai ra ai, hpa majaw nga yang: “Law law jaw ai wa hpe law law myit mada nga ai.” Lahkawng ngu na gaw, ya anhte gara shara kaw raitim, tsabyi sun a Madu hpe kaja ai hte asi si ai hku tsun dan na matu jin jin rai nga ra ai. Anhte gaw n-gun kya ai ni, matsan mayan ni hpe, anhte a npu na masha ni hpe, anhte yu lanu lahku ra ai ni hpe dip sha ai shaloi, tara rap ra ai wa hpe tara rap ra ai lam n jaw ai shaloi, tengman ai lam hpe n-gun n jaw ai sha, masu hkalem ai lam hpe grau ra sharawng ai shaloi, kabu gara lam a malai kaga masha ni hpe hkra machyi ai hte yawn hkyen lam ni hpe shabyin ya ai shaloi, Karai Kasang hpe myit daw myit hten shangun nga ai.

Anhte a prat hta Karai Kasang a tsabyi sun a sali wunli hkam la ai wa hku nna Hkristu a Madu tai ai hpe hkap la na gaw grai ahkyak nga ai. Karai Kasang a tsabyi sun rai nga ai anhte a prat hta shi a gingdan ai shara hpe shi hkam la na ahkang jaw ai gaw kaja ai asi si lu na lam langai sha rai nga ai. Tsun mayu ai gaw, Karai Kasang a shawng na tsabyi sun hta kaja ai asi n si lu ai. Ndai hku sha anhte hpe tengman ai, arawng lu ai, san seng ai, shakawn ging ai hte teng sha, kaja ai lam ni hte hpring tsup shangun lu na re; dai gaw Madu hpe sadi dung let kaja ai jahpan jaw lu na lam langai sha rai nga ai.