Lai wa sai aten hta, shanhte a daru magam hpe gumrawng gumtawng ai hku madun dan ai myit jasat nga ai nawku htung langai mi nga ai. Shanhte gaw teng man ai nawku htung re, shanhte a hpung masha ni hta lai nna kadai mung sumsing lamu de n shang na re ngu gumrawng gumtawng ma ai re. Kaga ni hpe shanhte hte rau shang lawm na matu shadut na malai shanhte a htawm hpang na hpung masha ni tai na ngu myit mada ai ni gaw shanhte hpe koi gam kau ma ai. Hpang jahtum ndai nawku htung gaw nawku htung shingra tara hta n-gun yawm mat ai aten du hkra rawt jat galu kaba wa ai lam ni hkring mat wa ai.
Masha ni hpe nawku htung langai hta shang na matu hpa gaw shadut ya lu ai kun? Teng sha nga yang gumrawng gumtawng ai lam n re ai sha shagrit shanem ai lam re. Masha law malawng grai ra sharawng ai shagrit shanem ai lam hpe ninghkap ai hku nna, gumrawng gumtawng ai lam hpe masha law law n ra sharawng ma ai. Shagrit shanem ai myit gaw, matsan dum chye ai masha ni hpe hkap la lu shangun ai magnet zawn re.
Ga shadawn, n tara ai hku n-gun jaw ai lam hpe gumrawng gumtawng ai hku madun dan ai nawku htung hta lawm na hpe nang ra sharawng na kun? Teng sha n re! Gumrawng ai wa (sh) shagrit shanem ai wa hte hku hkau mayu na kun? Teng sha nga yang, shagrit shanem ai wa hte jinghku hku na hpe nang grau ra sharawng na re.
Dai hte maren, anhte a makam masham de masha law law hpe woi sa lu nna, masha hpe grau nna akyu rawng ai nga hkwi ai ni tai wa na re. Anhte shagrit shanem ai hku asak hkrung nna, Yesu a shagrit shanem ai hpe kasi ningli la ga.