Daini na Ja Chyum Mungga hpe hti sum ru yu ai shaloi e, akroi  anoi akyu hpyi ra ai lam, akyu hpyi ga hpe htan ya ra na lam ni na la lu ga ai. Ya dai ni na kabu gara shiga hta e, n hkring n sa kyu hpyi ra ai lam a ahkyak ai lam hpe a san sha re ai ga shadawn hku nna, madi madun let tsun da nga ai. Madu Karai Kasang gaw, shi a kashu kasha ni hpe grau kaja ai lam ni hpe jaw mayu ai lam tsun dan na matu, shana yup tunghpa wa e du wa ai jinghku wa langai mi a ga shadawn hpe sung lang madun nga ai.

Anhte a Madu Karai Kasang gaw, lam sahgu hpe chye ya nga ai wa re.  Mungkan ntsa nga manga byin mabyin lam mahkra hpe mung sadi dung chye ya nga ai Karai Kasang mung rai nga ai. Dai re majaw anhte gaw shi hpe kam sham nna, atsam marai hte, akyu hpyi ra ga ai re. Shingrai anhte hpyi la mayu ai akyu hpe lu la hkra, myit daw hten run ai lam n nga ai sha, atsam marai dat ninggun shaja let, ding yang matut akyu hpyi na lam hpe tsun sharin ya nga ai. Dai majaw anhte yawng tinang a prat hta e, shani shagu ninggun dat sahkut sa ga law.