NU MARIA GAW PRAT A YAK HKAK LAM NI A LAPRAN ‘SHIM LUM AI SHARA’ RAI NGA AI
Htunghking labau hku nna “prat a yak hkak lam ni a lapran shim lum ai shingbyi shara” ngu nna shaga la hkrum ai Nu Maria gaw majan a majaw hkala nba hkrum ai mungkan a matu shalan shabran lam a npawt nhpang rai nga ai, nga nna Wa Sarabyin Leo tsun lai wa ai.
General Audience mungga hta, makam masham hpung masha ni hpe Rosary hti akyu hpyi ai hte shi hpang de sit sa na matu kalang bai tsun shadut da nga ai.
San Peter’s Square kaw nna, Wa Sarabyin a nsen gaw, lai wa sai Laban shani na Angelus hta shi tsun ai hpyi shawn ai lam hpe bai kahtap tsun ai, dai shaga ai lam hpe bat mi a shawng de, September 27 ya shani, Lourdes mare kaw galaw lai wa sai.
Portuguese ga shaga ai makam masham hpung masha ni hpe shakram ai shaloi, Wa Sarabyin gaw kaga Maria hpe shakawn shagrau ai myit dum poi langai mi hpe tsun dan ai rai nna, dai gaw October 12 ya shani galaw ai Brazil mungdan a Nu Maria Aparecida a myit dum ai poi rai nga ai. “Shi a kanu a akyu hpyi garum shingtau lam hpe ngai nanhte hte nanhte a dinghku ni hpe ap ya nga nngai, Nu Maria nanhte hpe galoi mung makawp maga nga u ga” nga nna Wa Sarabyin Leo tsun da nga ai.
Miwa ga shaga ai nawku bu hkawm sa ai ni hpe tsun shaga ai shaloi, Nu Maria hpe “yak hkak ai aten hte tsin-yam tsindam hkrum ai aten ni hta shingbyi shara hte n-gun atsam” ngu nna tsun dan ai.
‘mungkan ting na ma ni yawng simsa lam lu la na matu’ vatican kaw rosary hti ai
Vatican kata na Grotto of Lourdes hta, masha marai 1,300—dai hta na marai 700 gaw ma kaji ni rai nna, Wa Sarabyin Leo hte rau, ga amyu manga hku nna Rosary akyu hpyi ai lam galaw lai wa ai.
France mungdan hta, Wa Sarabyin gaw, “majan ni htum mat nna, manghkang byin nga ai amyu bawsang ni a lapran simsa lam lu la na matu, laksan yaw shada let, October shata ting Rosary akyu hpyi na matu, makam masham hpung masha ni hpe saw shaga da ai.”
Ndai akyu hpyi ga hpe tatut galaw sa wa na matu, “myit malai lu ai lam hte matsan dum lama ai lam hpe tup hkrak galaw ai lam ni” hte rau, “galoi mung bawngban hpawng galaw ai lam hte htinglu htinglai lam hpe n-gun jaw na matu” ga sadi jaw ai lam ni hte rau galaw na matu shi hpyi shawn da ai.
“Anhte hpe ngwi pyaw simsa lam jaw mi!”
Ndai shata praw langai ya shani hta, Vatican wang kaw nna, Wa Sarabyin a hpyi nem ga the rau ma marai 700 jan hte rau, “Anhte hpe ngwi pyaw simsa lam jaw rit!”ngu nna akyu hpyi lai wa ai.
Mungkan shara shagu na nsen ni gaw, lai wa sai nhtoi ni hta shanhte hte rau shang lawm nna, laknak n sen ni zim mat na matu akyu hpyi nga ma ai.
Ndai lamang hpe “Ma ni wan mi Rosary akyu hpyi ai” ngu ai masing hku nna galaw ai rai nna, dai hpe pontifical foundation Aid to the Church in Need kaw nna woi awn galaw ai rai nna, Padre Pio a ga hpe la kap ai hku nna galaw ai rai nga ai: “Ma wan mi rau Rosary akyu hpyi ai rai yang, mungkan gaw galai shai wa na re.” lam hpe wa sarabyin tsun n-gun jaw da nga ai.