Daini na Ja Chyum Mungga hpe hti sum ru yu ai shaloi e, Hprishe ni hte laika ka ai sara ni mara lu ma ai lam Yesu tsun ai hpe na chye lu ga ai. Dai ni na kabu gara shiga hta e, Madu Yesu gaw, chyum laika ka ai sara ni hpe ding nye lu myit dai ngu nna, aja awa tsun nga ai hpe mu chye lu ga ai. Shanhte ni gaw kaja masu nna, law la ai tara lam ni hpe hkan sa na matu masha ni hpe tsun ma ai. Shanhte ni bai rai yang, dai tara ni hpe kaji mi pyi n hkan sa ma ai. Ja ai tara rai nga ai. Tinang hpe n galaw shangun mayu ai lam hpe kaga wa hpe mung hkum galaw ngu ai tara u padi hte kaga ga rai nga ai. Masha ni mu mu ga nga, Hparishe ni a lup wa ni hpe sa hkungga jaw ma ai.

Kalang lang rai yang, anhte ni mung tinang a lawu kaw na ni hpe sha ripkawp tara hkan sa na matsun nna, tinang bai rai yang n hkan sa ma ai. Bai tinang gaw masha kaja hpyi hpun nna, kaga masha ni hpe gaw, mara jaw jahpoi asawng, tsun jahpyak, Madu hkum nan mung tengman tara lam hta n hkan sa ai. Bai hkan sa shatup ai ni hpe mung dingbai dingna jaw ai. N kaja ai lam maga de gaw woi dun sa bang chye ai ni rai nga ga ai. Dai majaw shiga madat ni yawng hte e, tinang mung Hprishe ni a arawn alai ni hta lup pyaw nga ga ai kun? Marai hkum shagu sawn dinglik yu ga. Shingrai shinggyim masha shada da myit tau ya hkat let, tengman ai tara a magam lam yan ni hta, ngang ngang tsap let, shada pawn ba sa nga ga law.