Wa Sarabyin Leo, 2026 ning October shat 18 ya shani galaw na, 100 ning hpring Mungkan Sasana Laban hpe masat masa galaw ai videomessage hpe shagun dat ai rai nna, shi a video hta, “One in Christ, United in Mission” ngu ai gabaw hpe myit sumru let, lai wa sai tsaban langai laman, shaning shagu galaw ai poi hpe madi shadaw ya ai ni yawng hpe chyeju dum ai lam tsun da ai.
Lai wa sai shaning 100 ning daram hta Wa Sarabyin Pius XI gaw Mungkan Sasana Laban hpe hpaw hpang wa ai aten kaw nna Nawku hpung hpe jaw ya ai “asi law law” a matu Karai Kasang hpe chyeju dum ai.
Shi a shawng na Wa Sarabyin wa gaw, Jau ginwang hte nawku hpung shagu hta sasana magam bungli hpe grau sung sung chye na hkra shakut ai, kabu gara shiga hkaw tsun ai hte sasana shaga la ai lam ni a matu akyu hpyi ai lam hpe n-gun jaw ai, Pontifical Mission Societies ni a magam bungli ni hpe madi shadaw ai lam ni hpe galaw lai wa sai lam, Wa Sarabyin bai myit dum ai.
Dai hpang Wa Sarabyin Leo gaw, ndai shakut shaja ai lam ni gaw shi a shaga la ai lam hpe gara hku hkrang shapraw ya ai hpe myit sumru yu ai.
“Ngai a ramma prat hpe bai myit yu yang, dan la ai Madu hpe akyu hpyi ai lam ni gaw, Augustinian sasana magam gun langai hku nna Yesu a shaga la ai lam hpe na lu na matu, nye a myit masin hpe mau hpa hku nna hkyen lajang ya ai hpe mu lu ai”, nga nna shi tsun ai. Kam sham ai ni a akyu hpyi ga hte alu gumhpraw ni gaw, Peru mungdan hta shi galaw nga ai sasana magam bungli hte, mungkan ting na n dang hti ai kaga sasana magam bungli ni hpe mung, madi shadaw ya nga ai, nga nna shi matut tsun ai. “Ndai lam a majaw, shaning law law na hkra Mungkan Sasana Laban hpe madi shadaw lai wa sai ni yawng hpe myit masin mahkra hte chyeju dum ai lam tsun mayu ai”, nga nna shi matut tsun ai.
Hkristu hta dinghku langai sha
Ndai shaning na ga baw de bai nhtang wa nna, Wa Sarabyin Leo gaw, Hkristu hpang hkan nang ai hta Nawku hpung a kahkyin gumdin lam hpe makawp maka na ahkyak ai lam hpe, grau nna hkye hkrang la ai lam a Kabu Gara Shiga hpe garan gachyan na matu, jawm ga sadi jaw na, ahkyak ai lam hpe madi madun da nga ai.
Baptism hkam ai hku nna, masha langai hte langai gaw Hkristu a Hkum hkrang hta lawm ai wa tai wa nna, “Yesu a hkye hkrang la ai magam bungli hta shang lawm na matu laklai ai lit nga ai” ngu shi sang lang dan ai.
“Anhte a Madu gaw dinghku langai hku nna, Chyoi Pra ai Wenyi a karum shingtau lam hte, shara shagu na masha shagu hpe Hkristu hpe kam sham ai hku hkau lam de woi shang wa lu na matu, jawm galaw na matu shaga la nga ai.”
Tsawra myit a sasana
Wa Sarabyin gaw, 2026 ning January shata 25 ya shani hta, shaning tsa ning hpring masat dingsat a matu shi a mungga hta, yawng hpe tinang a shaga la ai lam hte hkam la lu ai kumhpa ni hte maren alu gumhpraw bang na matu saw shaga ai lam hpe bai gram lajang da nga ai.
“Anhte yawng gaw, kabu gara shiga hkaw tsun ai sasana kaba hta shang lawm na matu ga sadi jaw ga — dai gaw galoi mung tsawra myit a bungli rai nga ai,” nga nna shi tsun shadut nga ai.
Akyu hpyi ai hte tatut madi shadaw ai lam gaw, “Karai Kasang a tsawra myit a Kabu Gara Shiga hpe masha shagu, grau nna matsan dik ai ni hte ra kadawn dik ai ni hpe” du hkra karum ya lu ai, nga nna shi matut tsun ai.
Shi a video shiga hpe hpungdim tawn let, Wa Sarabyin Leo gaw, Mungkan Sasana Laban Laban a lamu ga jarit hpe matut galaw sa wa na matu hte mungkan ting hta Nawku hpung a kabu gara shiga hkaw tsun sasana hpe garum madi shadaw ya na matu, makam masham hpung masha ni galaw sa wa na lam yawng a matu chyeju dum ai lam tsun ai.
