Daini na Ja Chyum Mungga hpe hti sumru yu ai shaloi e, nammak lawhpa lam na la lu ga ai. Ndai mungga naRamma wa gaw, shi lu su ai shi a sutgan ni gaw, shi shawng lam hta shim lum na sai ngu kam hpa ai raitim, jet ai shimlum lam gaw, Madu Karai hte makyit mahkai nga yang sha lu la mai ai lam sharin ya nga ai. Anhte shinggyim masha ni gaw n grin ai ndai mungkan ga a lam hta sha kyin taw nga nna, shi Madu hte grau grau tsan mat wa nga ma ai. Hpang na prat a matu sumsing mungdan a lu su nga mai na matu sumsing sut gan tam mahkawng na gaw malap mali rai nga len taw nga ga ai ni n rai a ni?

Ya jang tinang a lam hpe myit yu ga nu wa hpu nau ni e. Dai rai nna, anhte a madung da ai yaw shada ai lam ni hpe myit galai la nga ga. Ndai mungkan ga na ja sutgan ra marin ai lam ni hpe shayawm kau ga. Madu Karai Kasang kaw sut su nga pyaw lu na lam shakut sa wa ga. Madu Yesu hta sha anhte a prat hpe ap nawng da nna, Shi Madu jaw ya na shaman chyeju ni hpe kaga masha ni hte arau sha gam garan jaw ya nga ga. Dai majaw  shiga madat ni e, Madu Karai Kasang a agrin nga ai sumsing sutgan hpe madung tawn da let tam sahkut sa wa ga law.