Daini na Ja Chyum Mungga hpe hti sum ru yu ai shaloi e, Yesu a majaw hka bra wa ma ai lam na chye lu ga ai. Ndai kabu gara shiga hta e, galai shai mat ai hte hkabra mat ai lam hpe tsun da nga ai. Madu Yesu gaw, mungkan ntsa hta e, wan hkru wa na matu du sa ai wa ngu tsun ai. Wan ngu ai gaw, arunga rai langai mi hpe e mi na shi a nsam kaw na, tsep kawp galai shai kau lu ai atsam nga nga ai. Madu Yesu a mungga gaw, shinggyim masha ni a myit sawn da ai hte galaw sa wa ai lam ni kaw nna, tsep kawp galai shai mat ai lam hpe malai hku nna, Wan a hkrang hpe lang da nga ai.

Wan gaw san seng ai zawn, Madu Yesu a sharin shaga ai lam mung, masha langai hpra hte uhpung uhpawng kata ni a lapran e, sung la ai galai shai ai mabyin ni byin pru ai re. Shingrai Madu a matsun ai lam hte, mungkan ga a matsun wa ai lam ni gaw, kaga ga rai nga ai. Dai majaw Madu Yesu a lam hpe n hkan sa ai rai yang, shada da myit garan ginhka ai lam ni byin wa ai. Hpa baw lam ni hta raitim, n hkrum n ra ai lam ni byin pru wa ai. Dai majaw, Madu Yesu a ntsa sadi dung ai. Mungkan a lam ni hta mung sadi dung ai rai yang, manghkang maga de byin wa chye ai lam hpe madi madun ya nga ai. Shingrai hkabra ai lam a myu myu hte, ninghkap ai lam ni a lapran kaw nna, anhte gaw Madu Yesu hpe sadi dung nna, shi Madu a lam hta hkawm sa nga ga law.