Daini na Ja Chyum Mungga hpe hti sum ru yu ai shaloi e, Yesu hpe sat kau na matu Herod tam ai lam hte Yerusalem mare a matu Yesu hkrap ai lam na chye lu ga ai. Tsawra matsan du chye dik ai Madu Yesu gaw, tinang a amyu masha ni a ntsa tawn da ai kaba dik ai tsawra matsan dum chye ai myit hpe mu mada ya lu ga ai. Madu Yesu a shadawn n dang ai tsawra matsan dum lama ai myit a dam lada kaba sung la nga ai lam hpe mu chye lu na matu, U kanu gaw shi a u kasha ni hpe e, shi singkaw npu e ka-up da ai zawn, Madu Yesu a tsawra lam hte hkye hkrang la ai magam bungli lam yan hku nna, Isaela myu sha ni hpe bai kahkyin na matu a lang lang nan ra sharawng lai wa sai re. Shi Madu Yesu a ra sharawng ai lam gaw, anhte a hkye hkrang la ai lam a matu re ai hpe chye na lu na matu mung anhte yawng hpe shi saw shaga nga ai re. Dai majaw Madu Karai a singkaw npu hta e, anhte yawng a shim lum lam hte, sim sa lam ni hpe tam la nga na matu shi yaw shada nga ai. Shingrai Madu a singkaw npu hta e, tut nawng kam hpa let shingbyi nga sa ga law.