Daini na Ja Chyum Mungga hpe hti sum ru yu ai shaloi e, Hkristu gaw karai kasang shangun dat n`na du sa ai wa re lam hpe na lu na ga ai. Madu Yesu gaw, shi a myit langai hte sha masha sa tai ai n rai nga ai. Kawa Karai Kasang shangun dat ai majaw, du sa ai rai nga ai ngu shawa masha ni hpe tsun dan mat wa ai. Shi gara kaw na du sa wa ai ngu ai hpe hpa majaw tsun dan a ta nga yang, masha law malaw gaw, Madu Yesu hpe atsawm n chye ai ntsa lam sha chye ma ai majaw, shi sang lang dan nga ai re. Shingrai kalang lang anhte a lapran hta e mung byin chye nga ga ai. Manang langai ngai hte hku hkau ai zawn raitim, kata lam gaw hpa n chye ya ai lam ni law law byin chye nga ga ai.
Shinggyim masha gaw madu mu chye ai hku sha masha hpe tsun daw dang chye nga ga ai. Hpang jahtum e rai yang e gaw, masha hpe mara jaw, shi a gawngkya ai lam ni hpe tsun jahpyak, shut ai lam ni hpe chyu sha mu mada chye nga ga ai. Dai zawn sha Madu Yesu hpe mung masha ni gaw chye ai zawn rai nna, kaja wa nga yang, Yesu a lam hpe hpa mung n chye ya ai. Ntsa lam sha yu mada nna, daw dan chye ma ai. Raitim anhte shiga madat ai ni yawng a matu myit yu na lam langai gaw, Karai Kasang hte ntsa lam sha matut mahkai ai hku n re ai sha, Karai Kasang a mau hpa atsam ni, mai kaja ai lam ni, shi madu anhte hte rau nga nga ai ngu ai hpe tut e adum nga let, Karai Kasang hpe myit masin kata hta htep lahti matut mahkai nga na ahkyak dik rai nga ai law.
