(18th Ordinary Sunday, Year C)
PRAN WAN LADAW LABAN (18), C SHANING
(18th Ordinary Sunday, Year C)
CHYUM MUNGGA DAW NI:-
Hpaji Ningli 1:2, 2:21-23 …. Kaman lila, kaman lila, yawng mayawng kaman lia hkrai rai nga ai.
Kolose 3:1-5, 9-11 …… Greka masha hte Yuda masha ngu nna n mai ginhka ai: Hkristu chyu sha nga nga ai; Shi gaw yawng mayawng rai nga ai hte, yawng mayawng hta e nga nga ai.
Luka 12:13-21 …… Masha gaw sutgan law law lu timung, dai sutgan shi a asak hpe rem sin nga ai n rai.
SHAWA HPAWNG KATA DE NA MASHA LANGAI MI TSUN AI GA
Sara e, ngai hpu wa hpe ngai hte sali wunli garan la na lam tsun ya e, ngu nna Yesu hpe tsun wu ai. Yesu gaw, jinghku wa e, nan a ntsa e tara agyi hte hparan wa tai na, ngai hpe kadai san da a ta?ngu nna shi hpe htan wu ai. Dai masha wa ra sharawng ai mahtai hpe n tsun ai, rai tim, shawa masha ni hpe tau shawng sadi jaw wu ai. Nammak lawhpa ai myit mahkra hpe hkap shadang lu hkra, sadi ai hte maja nga mu. Kaning rai nme law, masha gaw sutgan law law lu timung, dai sutgan shi a asak hpe rem sin nga ai n rai, ngu wu ai.
JESU GAW SHAWA MASHA NI HPE GA SHADAWN LANGAI MI HKAI DAN WU AI
Sahti langai mi a yi hkauna gaw nsi naisi hkai nmai grai kaja lu ai. Myit mada ai hta grau nna nsi naisi law htam nga lu ai. Dai wa gaw, ngai kaning di na i? nye a nsi naisi shinggyin da na shara n lu nngai, ngu nna myit yu nga ai. Dai hpang, shi gaw grai myitlet let lam mi hpe dum dat wu ai. Shi gaw mam dum dingsa ni hpe run kau nna, grau kaba ai galaw na we ai. Dai ni hta nye a nsi naisi ni hte sut rai mahkra hpe ngai shinggyin da na nngai. Dai hpang, nye myit masin e, myit hkum ru sa; lu nu, sha nu, pyaw pyaw rai nga u, ngu tsun na nngai.
KARAI KASANG DAI SAHTI WA HPE TSUN AI
“Masha angawk e,” dai na jang na a asak hpe dawm la kau ya na ra ai. Dai rai nna, nang mahkawng shachyip da ai arai ni gaw, gade a matu tai na ra ta? ngu wu ai.
SHARIN LA LU AI LAM
Yesu gaw sutgan hpe n kaja ai nga nna n tsun ai raitim, tau shawng sadi jaw ai lam gaw nga ai. Tinang lu ai sutgan hpe akyu rawng hkra jai lang chye ra ai hpe sadi jaw ga tsun nga ai. Tinang a ningmu jaw htuk ra nga ai. Karai Kasang jaw ai kumhpa (hkrang rai hte wenyi hte seng ai sutgan) hpe jaw ang ai hku jai lang ra nga ai. Hkristan masha ni mung sut gan tam mahkawng ai hta atsam dat ra nga mali ai. Tinang a matu chyu sha sut gan mahkawng da ai gaw akyu n jaw nga ai. Nammak lawhpa myit hpe hkap shadang lu hkra, sadi ra nga ai. Matsan ai hte ra kadawn ai ni hpe garum shingtau ai hku nna, sumsing lamu hta tinang a sutgan hpe mahkawng da ra mali ai.
CYUM MUNGGA DAW LANGAI & DAW LAHKAWNG
… Shawng hti ai Hpaji Ningli Laika hta, mungkan ga a sutgan arung arai tam mahkawng ai hta tinang a ngwipyaw lam hpe madung tam ai gaw, kaman lila hkrai rai nga ai, nga nna tsun nga ai. Hpa majaw nga yang, mungkan ga na hpa mung grin ai lam n nga ai. Tinang hpe myit dik hkra shatup shadik ya lu lam n nga li ai. Dai majaw, yawng mayawng kaman lila hkrai rai nga ai.
… Kolose masha ni hpang de Kasa Pawlu shagun dat ai laika hta, Pawlu tsun dum ai gaw, “Ga ntsa na lam ni hpe myit hkum manoi mu, ntsang mungdan a lam ni hpe myit manoi nga mu.” Nahte si mat ai ni rai nga myit dai rai nna, nanhte a asak Hkristu hte rau Karai Kasang hta e kyem da nga ai. Anhte a asak ngu ai Hkristu gaw dan pru wa ai shaloi e, nanhte mung Shi hte rau hpung shinkang hta dan pru na marin dai.
“Nammak lawhpa lam yawng hta na myit hpe shim shadang nna koi gam mu: kaning re nme law, sutgan law htam wa ai hta, masha asak rawng ai n rai.” (Lk 12:15).