Readings: 1st: Prov 31: 10-13.19-20; Ps: 127; 2nd: 1Thess 5:1-6; Gos: Mt 25:14-30
Ndai nawku daw jau ai A shaning htum wa maga de du wa ai hte maren, nawku hpung gaw anhte a baw rai nga ai Hkristu hpe sadi dung let ap nawng na matu n-gun jaw nga ai. Mayam kaja ni hku nna Shi Madu hta ap nawng ra ai. Bai nna, anhte a hpaji hpe Shi hpe tup hkrak tsun dan na matu jin jin rai nga ra ga ai.
Ndai Laban shani na daw 1 gaw ga shagawp kaw na rai nga ai. Ga Shagawp hta lawm ai kaja ai numsha gaw htoi tu ai shagan zawn htoi tu kabrim nga ai. “Kaja ai” ngu ai ga si gaw, n-gun atsam, atsam marai marai hpe tsun mayu ai. Ndai shara hta, wenyi hte akyang lailen n-gun atsam lahkawng yan hpe tsun ai zawn, arawn alai ngang kang ai lam hpe mung tsun mayu ai (Rut 3:11). Dai majaw, shi sari sadang gaw shi a arawn alai hte ap nawng ai lam a n-gun atsam a majaw rai nga ai.
Sari rawng ai numsha gaw kaja ai, sadi dung ai, dinghku hpe rau nga lu hkra hpa galaw ra ai hpe chye ai. Dai hta n-ga, “ra kadawn nga ai ni hpe shi a lata ladawn ya ai.” Daini, sari rawng ai numsha gaw, anhte a Baw Hkristu hte hkrum na matu, anhte hpe atsawm sha hkyen lajang ya nga ai, Chyoi Pra ai Kanu Nawku Hpung a kumla rai nga ai. Shi a tut nawng sharin achyin ai lam ni hte karum shingtau ai lam ni hku nna anhte hpe hkyen lajang ya nga ai. Dai majaw, ndai gaw sari rawng ai numsha a atsam ningja ni hpe kasi la na matu shaga ai lam re. Anhte mung shi zawn anhte a shaga la ai lam ni hte Karai Kasang a sasana magam bungli ni hpe sadi dung let ap nawng nga ra ga ai.
Daw Lahkawng hta, Pawlu gaw nhtoi a kasha kaw na myit mada da ai akyang lailen hpe anhte hpe tsun dan nga ai. Shi gaw n mu mada lu ai – Madu a Nhtoi hpe shadum ya nga ai. Shi tsun ai hku nga yang, ndai “Nhtoi” a ahkyak dik ai arawn alai langai gaw, akajawng sha byin wa na re: “Masha ‘n dum ndam hte simsa ai nga nna tsun taw ai aten hta akajawng sha byin pru wa na re…”
Maga mi hku tsun ga nga yang, Pawlu gaw ndai Madu a nhtoi a matu hkyen lajang ai lam hta sadi maja let shamu shamawt nga na matu n-gun jaw nga ai sha rai nga ai. “Gregoreuo” ngu ai, Pawlu lang ai Greek ga si gaw, yup pyaw nga ai wa a myit masin hta galoi mung sadi maja let nga taw ai hpe tsun shaleng dan ai rai nga ai. Ndai myit masa gaw si mat sai (sh) n dum shami yup pyaw nga ai masha hte shai nga ai. Hkristu hpe ala nga ai laman Hkristan ni hku nna anhte hkam la ra ai shara rai nga ai.
Pawlu a shaga la ai lam, gaw jin jin rai nga na matu hte htani htana manu dan ai lam ni hpe myit dum let sak hkrung na matu shaga la ai lam rai nga ai. Dai hku galaw yang, mungkan hte myit hkrum ai ni hta grau kaja ai prat hpe teng sha lu la na re. Dai majaw anhte gaw, magam bungli hta shamu shamawt nga ai hpyen la ni zawn (2 Ti 2. 4), shi a madu wa hte kasha ni hpe myit pyaw shangun na matu bungli galaw ai sari rawng ai numsha zawn asak hkrung ra ga ai.
Kabu gara shiga hta, Yesu gaw, anhte a gumhpraw ni hpe jaw teng ai jahpan tsun dan na matu jin jin rai nga ra ai hpe shadum na matu, gumhpraw ga shadawn hpe lang da nga ai. Karai Kasang gaw anhte langai hte langai hpe n bung ai atsam marai jaw da sai. Langai hte langai, anhte a atsam amyu myu hte maren. Dai majaw, sadi dung ai mayam ni hku nna, anhte lu la ai “talent” ni a lam hpe jaw ai hku tsun dan na matu myit mada nga ai.
Anhte a atsam marai ni hpe hpaji rawng ai hte akyu pru hkra galaw na matu Yesu anhte hpe shadut nga ai. Ahkyak dik htum gaw, Shi n myit mada ai bai du sa na hpe myit mada let asak hkrung na matu hpaji jaw nga ai. Ndai bai nhtang wa ai lam hpe lagaw lamawn hte sha n mai la nga ai. De a malai, anhte lu la ai atsam marai ni hte shamu shamawt nna shakut shaja ra ai. Dai majaw, anhte a atsam marai hpe Karai Kasang a hpung shingkang a matu jai lang ra ai.
Dai majaw, Madu bai du wa na hpe anhte la nga ai laman, myit mada shara hta n rai ra ai, anhte kaw na jahpan jaw ra ai hpe myit dum let, Hkristu hpe hkrak sakse hkam ai hku nna, shakut shaja ai hte shamu shamawt ra ai. Dai mayam masum zawn anhte hta mung madang bung ai kumhpa ni nga ai gaw teng nga ai, rai tim Karai Kasang gaw anhte hpe jaw da ai kumhpa ni hte maren sha byin pru wa na mahtai hpe anhte kaw na myit mada nga ai. Dai majaw, anhte hpe jaw da ai hpaji hparat hpa hpe raitim, Karai Kasang a hpung shingkang a matu, anhte dang lu ai daram jai lang ra ai, dai hpe galaw ngut ai shaloi, kaga kam sham ai ni hte maren mara ginsup shara kaw rai nga sai.
Dai majaw Karai Kasang a kam hpa mai ai mayam ni hku nna anhte gaw, anhte a sasana magam bungli hte bungli hpe n myit mada ai, myit n lawm ai, n hkru n kaja ai, myit n dik ai prat hpe koi gam ra ai, hpa majaw nga yang ndai lam ni gaw Hkristu kaw na shabrai hpa mung n lu la na re. Hkristu bai du sa na hpe la nga ai aten hta sha, shi a magam bungli hpe kasi la nna, jat wa ai rai yang, anhte gaw sadi dung ai, ap nawng ai hte hpaji rawng ai sape ni rai nga ga ai. Karai Kasang a mungdan du wa na lam hpe, kawsi hpang gara ai ni hpe lusha jaw sha ai, machyi makaw hkrum ai ni hte htawng rawng ai ni hpe sa kawan nna shamai ya ai, myit sumnung ai ni hpe shaman ya ai, kaji dik ai ni hpe daw jau ai, singgu krin re ai ni hpe bu hpun palawng jaw ai, manam ni hpe hkap tau la ra ai (Mt. 25:31-46).
Anhte lu la ai talent ni hte sadi dung nna, akyu pru hku galaw ai rai yang, anhte a baw Hkristu mung anhte hpe ndai hku tsun na re: “Kaja ai hte sadi dung ai mayam e, kaja wa galaw nit dai.”