HTAI YA AI WA – Wa Jau Dr. Joseph Gawlu Yung Wa

GA SAN –       Kashin Kamun (Baptisma) hkam ai hpe ngai hku chye na da ai gaw npawt shut hpyit mara hpe gashin kau ya ai lachyum hpe chye na da ai.  Shut hpyit mara yu bak mara hpe kashin kau ya ai n re lam na lu ai.  Teng ai kun?

 HTAI –            Npawt shut hpyit mara ngu ai gaw, Shawng nnan na shinggyim masha ni (Adam the Eva), Karai Kasang myit ra sharawng ai lam hpe n re ai sha, tinang tingkyeng pandung hte akyu a matu lata hkan galaw ai a akyu mahtai rai nga ai.  Dai majaw, shinggyim masha shagu shangai wa ai shaloi – dai nli lawm wa ai.  Anhte Madu Yesu hpe kam sham nna myit malai let Baptisma (Kashin Kamun) hpe hkam la ai shaloi, Madu Yesu wudang ntsa si hkam nna bai hkrung rawt wa ai a marang e, shi a chyeju ningsang hte hkye hkrang la ai lam anhte hpe jaw ya sai.  Dai hpe Nawku Hpung gaw Npawt shut hpyit mara hpe kashin rawt dat kau ya ai ngu nna shamying ai.

Anhte Baptisma hkam la nna dai ding hpring ai chyeju hpe lu la da saga ai raitim, hkum shan, mungkan hte Satan a gunglau ai hpe gaw n sim n sa naw hkrum ra ga ai. Ndai agung alau ni a gang ai de yawng na kun? Karai Kasang ra sharawng ai san seng chyoi pra ai dinghpring ai de hkan na kun lata ra ga ai.  Anhte dai agung alau ni a hpang de hkan nna shut hpyit kau ai (tinang galaw kau sai ) mara ni hpe mung Mara Raw Chyeju Kumla hku nna naw raw ya nga ai.

Npawt Mara ngu ai hte tinang galaw shut kau ai mara ngu ai hpe chye madat da yang gaw mahtai lu na sai.

GA SAN –       Sasana ma kaji hpung hpe gara shaning hta hpaw hpang dat ai re kun?

 HTAI –           1843 Ning hta Saradaw Charles de Forbin-Janson, New York mare na lapran tsang jawngma ni hte hpaw hpang dat ai.

SAN AI  NI – Nmawk Jau Ginwang, Dagaw Mare hta nga lai wa nna, ya, Man Je ginwang Mung Hking mare hta shanu nga ai Rosa Hkawn Hpang hte Nmawk Jau Ginwang, Goi Kahtawng Zaibru yang kaw nga nna, ya, Lai Za kaw du taw nga ai Lucia Labang Ja Seng Pan