2025 ning November shata praw 2 ya shani hta, Wa Sarabyin Leo XIV gaw Rome’s Verano lup ding lup ra hta ‘All Souls’ Day’ Missa hkungga hpe galaw lai wa ai. 2013 ning hta Wa Sarabyin Francis kaw nna hpang wa ai kam sham ai hpung masha ni hpe buga lup ding lup ra ni hta myit dum akyu hpyi ya ai htung lailen hpe matut manoi galaw lai wa ai. Ndai lamang hpe lup sung nlung ni hte labau shang lup lawng ni a lapran galaw ai rai nna, Nawku hpung masha 2,500 daram sa du shanglawm ma ai.
Wa Sarabyin gaw, dai shara kaw lup makoi da ai si mat ai ni yawng hpe masat masa hkungga jaw nna, Nicolini dinghku a lup sung hku ntsa e, Numri pan ahpraw ni hpe tawn da ya ai. Shi a mungga hta, myit dum ai lam, tsawra myit, Hkristan myit mada lam hpe myit sumru let, si mat sai ni hpe myit dum ai lam gaw lai wa sai aten hpe sha yu ai n re sha, Hkristu hta ga sadi tawn da ai hkrung rawt ai lam hte htani htana asak hpe shawng nnan myit dum ra ai lam hpe ahkyak shatai tsun dan ai.Karai Kasang gaw “si hkrung si htan hpe htani htana jahten kau na ra ai. Yesu hkristu gaw Paska mung sung hta si hkrung si htan hka raw lam lai di lai wa ai zawn, anhte mung dai dai lam hku lai di ra ga ai.
“Tsawra myit gaw si hkrung si htan hpe dang kau lu ai. Tsawra myit hta Karai Kasang gaw anhte hpe tsawra ai ni hte rau shinggyin la na re. Bai nna, tsawra myit hte rau hkawm sa ai rai yang, anhte hkum nan Karai Kasang hpang de rawt lung wa ai akyu hpyi ga tai wa nna, si mat sai ni hte anhte hpe kahkyin gumdin shangun ai, htani htana asak a kabu gara lam hta shanhte hte grau ni htep hkra galaw ya ai.”
Si hkrung si htan hpe awng dang ai lam gaw, yawn hkyen ai lam hpe lachyum jaw ya ai, myit mada shara hpe madi shadaw n-gun jaw ya ai Hkrung rawt sai Hkristu a myi man hpe anhte yawng a zi mada yu na matu tsun shadut dat ai.
Vatican de bai nhtang wa ai shaloi, Wa Sarabyin Leo gaw, si mat sai Wa Sarabyin ni a matu Saint Peter’s Basilica npu Wa Sarabyin ni hpe lup makoi da ai shara hta, shi hkrai sha akyu hpyi ya lai wa ai.